Milani ka nisur lëvizjet në “Pazar” për ta përforcuar repartin defanziv, me trajnerin Massimiliano Allegri që ka kërkuar qartë afrimin e një qendërmbrojtësi të ri.
Kuqezinjtë po i vlerësojnë disa opsione, ndërsa një nga emrat që ka dalë në pah është ai i Radu Dragusin.
Sipas mediave italiane, drejtori sportiv i Milanit, Igli Tare, ka pasur kontakte të drejtpërdrejta me Tottenham Hotspur për ta diskutuar mundësinë e transferimit të mbrojtësit rumun, përcjell “Gazeta Express”.
Dragusin, i cili ka përvojë të mëparshme në Serie A, shihet si një profil i përshtatshëm për kërkesat taktike të Allegrit.
Megjithatë, pengesa kryesore mbetet formula e marrëveshjes.
Kuqezinjtë e preferojnë një huazim me të drejtë blerjeje në fund të sezonit, ndërsa Tottenhami kërkon një obligim blerjeje, të lidhur ose jo me kushte të caktuara sportive.
Kjo diferencë po i ngadalëson për momentin negociatat mes palëve.
Paralelisht, drejtuesit kuqezi po mbajnë të hapura edhe pista të tjera për mbrojtjen.
Një nga alternativat e përmendura është edhe Mario Gila i Lazios, megjithatë edhe në këtë rast situata është ende në fazë vlerësimi.
Afati kalimtar i janarit është ende i hapur dhe ditët në vijim priten të jenë vendimtare për ta kuptuar nëse Milani do të arrijë ta mbyllë një përforcim në zemër të mbrojtjes, ashtu siç kërkon Allegri për pjesën e dytë të sezonit.
