Forca e Sigurisë së Kosovës (FSK) ka përmbyllur me sukses Kursin për Mbrojtje të Afërt, i cili u realizua në bashkëpunim me Ministrinë e Mbrojtjes së Gjermanisë, në kuadër të Planit të Bashkëpunimit Dypalësh për vitin 2025 në fushën e mbrojtjes.
Ky ishte kursi i parë i këtij lloji i organizuar ndonjëherë nga Policia Ushtarake e FSK-së, dhe u zhvillua nën udhëheqjen e instruktorëve të certifikuar të kësaj njësie elitare, me asistencën profesionale të instruktorëve gjermanë dhe nën mbikëqyrjen e Komandës së Doktrinës dhe Stërvitjes (KDS).
Trajnimi përfshiu një gamë të gjerë teknikash të avancuara, përfshirë qitjen me armë të shkurtër dhe të gjatë, taktika të vetëmbrojtjes, lëvizje në formacione luftarake dhe manovrime të kontrolluara me automjete në situata të rrezikshme.
Synimi kryesor ishte përmirësimi i aftësive profesionale të pjesëtarëve të Policisë Ushtarake në fushën e Mbrojtjes së Afërt.
“Forca e Sigurisë së Kosovës vlerëson lart kontributin e instruktorëve gjermanë dhe mbështetjen e Ministrisë së Mbrojtjes së Gjermanisë në këtë proces. Përfundimi me sukses i këtij kursi kontribuon drejtpërdrejt në rritjen e kapaciteteve operacionale të Policisë Ushtarake,” thuhet në njoftimin zyrtar të FSK-së.
