Pas më shumë se tre orësh qëndrim, ish-presidenti Hashim Thaçi tashmë ka dalë nga Qendra Klinike Universitare e Kosovës, ku ishte për vizitë te babai i tij.
Ai u pa i rrethuar nga forcat e shumta policore dhe ato të EULEX-it, e po ashtu nga disa mjekë që e përcollën nga Klinika Interne.
Duke dalë nga QKUK, Thaçi u përcoll nga qytetarë të shumtë të cilët duartrokisnin e brohorisnin, ndërsa edhe i përshëndeti ata me dorë.
Krahas qytetarëve, aty është parë edhe vëllai i tij, Gani Thaçi.
Thaçit deri më tani i ishin refuzuar disa kërkesa për ta vizituar babanë e sëmurë.
Vizita e tij u zhvillua në masa të rrepta sigurie, jo vetëm jashtë qendrës së QKUK-së por edhe brenda saj.
