Kryetari i Komunës së Pejës, Gazmend Muhaxheri, është parë së fundmi i shoqëruar me ish-shefin e kabinetit të tij, Durim Sheremetin, i cili në vitin 2022 u dënua me 6 muaj burgim nga Gjykata Themelore e Pejës për veprën penale “Keqpërdorim i pozitës apo autoritetit zyrtar”.
Pavarësisht dënimit të tij, Sheremeti vazhdon të shoqërohet ngushtë me zyrtarë komunalë, përfshirë edhe vetë kryetarin Muhaxheri, i cili po synon edhe një mandati të ri në krye të komunës.
Pamjet tregojnë Muhaxherin dhe Sheremetin së bashku në një dasmë të mbajtur këtë fundjavë në Pejë.
Muhaxheri shoqërohet me zyrtarin e dënuar për korrupsion, drejtoresha vallëzon me të në dasmë – Insajderi – image 71
Në video dhe fotografi shihet gjithashtu edhe drejtoresha e Kulturës, Rinisë dhe Sportit në Komunën e Pejës, Xhenet Syka Kelmendi, duke vallëzuar së bashku me ish-zyrtarin e dënuar për korrupsion.
Madje ajo ka publikuar edhe fotografi në Facebook, ku prezent është edhe Durim Sheremeti.
Gazeta Insajderi ka kontaktuar kryetarin Muhaxheri lidhur me këtë shoqërim. Ai nuk e ka mohuar shoqërimin e tij me Sheremetin, madje ka dërguar edhe fotografi të tjera bashkë me të.
“Ndoshta nuk e keni fotografinë e mirë. Po ua dërgoj një më të mirë”, ka komentuar ai.
Ndërkohë, pyetje janë adresuar edhe drejtoreshës Xhenet Syka Kelmendi, por ajo nuk ka kthyer përgjigje.
