Ministri i Financave, Hekuran Murati, i autorizuar nga ministrja Mimoza Kusari-Lila, ka paraqitur sot në Kuvend projektligjin për Masat e Përkohshme të Produkteve Themelore në Raste të Veçanta të Destabilizimit në Treg, i njohur si Ligji për Çmimet Tavan.
Sipas tij, ky projektligj synon vendosjen e masave me qëllim mbrojtjen e konsumatorit dhe interesit publik.
“Një projektligj që është përgjigje politike dhe shtetërore ndaj një nevoje reale të qytetarëve të Kosovës që shteti të mos mbetet si spektator kur çmimet e produkteve bazë dalin jashtë logjikës ekonomike dhe rëndojnë drejtpërdrejt në familjet tona. Ky projektligj synon të vendosë masa të përkohshme dhe proporcionale për produktet themelore në raste të destabilizimit të tregut, me fokus të qartë në mbrojtjen e konsumatorit dhe interesit publik”, tha Murati.
Më tej, ai u shpreh se ky projektligj nuk është kundër bizneseve, por sipas tij ndan kufirin mes fitimit të ligjshëm dhe abuzimit në rrethana të krizës.
“Pra, kemi të bëjmë me një instrument të jashtëzakonshëm për situata të jashtëzakonshme, jo me një mekanizëm të përhershëm të ndërhyrjeve në ekonomi. Për këtë arsye, ky projektligj nuk është kundër biznesit, as kundër tregut të lirë, përkundrazi është ligj për rregull, parashikueshmëri”, u shpreh Murati.
