Vedat Muriqi po zhvillon një sezon fantastik tek Mallorca në La Liga.Sulmuesi kosovar është në mesin e golashënuesve më të mirë në nivelin elitar të futbollit spanjoll, duke bërë që tifozët e Mallorcas të lidhen fortë me të.
Si në rrjetet sociale, si në stadium ashtu edhe në rrugët e qytetit, emri i Vedat Muriqit është prezent, me një numër të madh të tifozëve që kërkojnë që Muriqi ta përfundojë karrierën e tij në ‘Palma’.Madje, tifozët e këtij qyteti dhe jo vetëm, kanë filluar ta njohin dhe të interesohen edhe për vendin tonë, Kosovën.
Pedro Vera, një tifoz i kësaj skuadre, ka udhëtuar në Kosovë për të parë qytetin nga vjen Vedat Muriqi, Prizrenin. Ai ishte tek restoranti i familjes së sulmuesit kosovar, ku tha se ka ngrënë edhe ushqimin favorit që ka Muriqi, qebapat.“Më pëlqeu shumë vizita ime në Kosovë, ishte një përvojë shumë e bukur dhe do të doja të kisha mundur të vizitoja pjesë të tjera të vendit, por kisha kohë vetëm të vizitoja Prizrenin dhe Prishtinën. Mendoj se Prizreni është shumë i bukur dhe interesant. Kam kaluar shumë orë duke ecur buzë lumit dhe kam vizituar edhe restorantin e familjes së Muriqit dhe aty kam ngrënë qebapat. Ishte shumë bukur të zbuloja vendin ku është rritur ai.
Kam lexuar disa intervista dhe e di që nuk ka qenë e lehtë të jetë këtu si një futbollist profesionist, por ai tani po bën një punë të shkëlqyer në Real Mallorca, ai po performon në një nivel të lartë dhe është një nga golashënuesit më të mirë të La Ligës. Mendoj se ai po lobon edhe për Kosovën dhe situatën me Spanjën dhe vendet e tjera. Ai është një person modest dhe është shumë i dashur në Mallorca, mendoj se e meriton këtë sukses”, tha fillimisht Pedro Vera për ‘GazetaBlic Sport’.
