Themeluesi miliarder i kompanisë “Neuralink”, Elon Musk, ka thënë se njeriu i parë që i është vendosur një implant nga kjo firmë të dielën është duke e marrë veten mirë.
Administrata e Ushqimit dhe Ilaçeve e ShBA-së ia kishte dhënë dritën e gjelbër vitin e kaluar kësaj kompanie për ta kryer testin e parë të implantit në njerëz, raporton gazeta “The Guardian”.
“Rezultatet fillestare shfaqin vërejtje premtuese të majave të neuroneve”- shtoi Musku.
Majat janë aktivitet i neuroneve, të cilat Instituti Kombëtar i Shëndetit i përshkruan si qeliza që përdorin sinjale elektrike e kimike për të dërguar të dhëna nëpër tru e në trup.
Kompania “Neuralink” nuk iu përgjigj një kërkese për të ofruar më shumë hollësi.
Agjencia “Reuters” më herët këtë muaj kishte raportuar se kompania “Neuralink” ishte gjobitur për shkelje të rregullave të Departamentit të Transportit të ShBA-së në lidhje me lëvizjen e materialeve të rrezikshme.
Gjatë inspektimeve në objektet e kompanisë në Teksas dhe Kaliforni në shkurt të vitit 2023, hetuesit e Departamentit të Transportit kishin zbuluar se kompania kishte dështuar që të regjistrohej si transportuese e materialeve të rrezikshme.
Ata gjithashtu kishin gjetur paketim jo të duhur të mbetjeve të rrezikshme, përfshirë lëngun e ndezshëm, Xylene. Kjo lëndë mund të shkaktojë dhimbje koke, konfuzion, marramendje, humbje e bashkërendimit muskulor dhe madje edhe vdekje, sipas Qendrave për Kontrollimin dhe Parandalimin e Sëmundjeve në ShBA.
