Një përplasje verbale në Kuvendin e Kosovës ka nxitur reagime të ashpra politike, pasi deputetja e PDK-së, Ganimete Musliu, ka akuzuar tri deputete të Lëvizjes Vetëvendosje për bullizim ndaj deputetit të ri të LDK-së, Paris Guri.
Përmes një reagimi publik, Musliu ka bërë me dije se Guri është bullizuar për shkak të emrit dhe moshës së tij, gjatë paraqitjes së tij të parë në foltore.
“Deputeti i ri, Parisi, në vend që të inkurajohej dhe të mbështetej në hapat e parë të tij në Kuvend, u përball me një fushatë të organizuar talljeje dhe ofendimi, jo për përmbajtjen e fjalës së tij, por për emrin dhe moshën e tij”, ka shkruar Musliu.
Sipas saj, në qendër të kësaj “fushate bullizuese” ishin tri deputete të VV-së: Mimoza Kusari, Donika Gërvalla dhe Fitore Pacolli.
“Një veprim i tillë jo vetëm që shkel parimet bazë të etikës parlamentare, por dërgon edhe një mesazh të rrezikshëm për rininë e angazhuar në politikë, se në vend të inkurajimit, do të përballen me përbuzje e përqeshje”, ka shtuar Musliu.
Ajo përmbylli reagimin duke theksuar se kjo qasje është e papranueshme dhe demotivon të rinjtë që duan të kontribuojnë për të ardhmen e vendit.
“Qasja e Vetëvendosjes ndaj një deputeti të ri është e frikshme dhe e papranueshme. Nëse një emër ose një moshë e re është arsye për t’u përbuzur në Kuvend, atëherë çfarë mesazhi u jepet të rinjve që duan të kontribuojnë për vendin?” – ka përfunduar Musliu.
