Drejtori Agjencisë Kosovare për Inteligjencë, Petrit Ajeti, sot ka raportur në komisionin e Parlamentit të Kosovës që e mbikëqyrë këtë institucion, të cilin e drejton Ganimete Musliu.
Deputetja e PDK-së, Musliu është pyetur për çështjen që u raportua javën e kaluar se AKI po i përcjell disa gazetarë që janë kritikë ndaj qeverisë si Vehbi Kajtazi, Ilir Mirena, Berat Buzhala e Lirim Mehmetaj.
Por, Musliu duke e cituar Petrit Ajetin tha se ai ka mohuar një gjë të tillë.
“Drejtori i AKI-së e mohon që mediat ose gazetarët përndjeken nga agjentët e AKI-së. Kjo është ajo çfarë mund me ndajë me ju”, ka thënë Musliu.
Më pas ajo ka treguar edhe përmbajtje tjera të bisedës me të.
“Bashkërisht u dakoorduam që liria e medias është esenciale për ruajtjen e demokracisë në vend, dhe cenimi i lirisë së medias është cenim i lirisë sonë në përgjithësi dhe shkatërrim i institucioneve”.
“U vu në konsideratë ruajtje e institucionit të AKI-së, partitë shkojnë e vijnë. Ne jemi shtet demokratik dhe institucioni i AKI-së duhet të ketë kredibilitet”, ka thënë Musliu.
