Deputetja e PDK-së, Ganimete Musliu, ka kritikuar ashpër situatën e politikës së jashtme dhe mungesën e lidershipit të brendshëm të Kosovës, teksa ka folur për deklaratën e presidentit Trump për çështjen Kosovë-Serbi.
Ajo për GazetaBlic ka theksuar se vendi ka rënë nga agjendat e politikës ndërkombëtare, duke shtuar se kjo është pasojë e dështimit të politikës sonë të jashtme.
“Bota është në lëvizje dhe duke qenë kështu Kosova ka rënë nga agjendat e politikës ndërkombëtare. Shto këtu edhe dështimin e politikës sonë të jashtme.”
Musliu ka kritikuar gjithashtu gjendjen aktuale të qeverisjes, duke thënë se angazhimi i administratës Trump për Kosovën është i rëndësishëm, por nuk mjafton për të siguruar stabilitet.
“Një angazhimi të administratës Trump për Kosovën do duhej t’i duartrokisnim. Pa çka se ne sot jemi pa një qeveri të rregullt dhe pa kuvend funksional. Një Albin në detyrë, një Besnik Bislimi pa plan dhe një Donikë Schwarz pa asnjë kredibilitet politik përballë Trump-it është një imazh i frikshëm”.
Deputetja theksoi se përderisa bota është duke ecur përpara, Kosova është në një vakum institucional që mund të ketë pasoja të rënda.
“Përderisa bota po valon ne jemi duke e lënë vendin në një vakum institucional. Përndryshe vëmendja e SHBA-ve në raport me Kosovën, në parim, gjithmonë brenda vetës inkorporon shpresën për garancinë dhe sigurinë e shtetësisë tonë”, përfundoi Musliu për GazetaBlic.
