Kujtimet e 38-vjetëve të familjes Beboviq, iu rrënuan në vitin 2010. Tokën në të cilën jetuan që nga viti 1972, vendosën ta jepnin tek investitori e në këmbim të merrnin banesa.
Një marrëveshje e tillë me investitorin, vëllezërve Beboviq po iu konvenonte, pa e ditur se ajo do ishte arsyeja që komunikimi mes tyre do ndalonte.
Në një intervistë për KIKS Kosovë, Ruhan Beboviq kthehet në kohë dhe kujton kur ata morën ofertën nga kompania LABI COM. Dora mes Beboviqëve e Shefqet Gashit u dha, e marrëveshja u bë.
Për truallin që kishin dhënë, Gashi u kishte ofruar atyre nga 8 banesa. Edhe leja ndërtimore nga komuna u mor për gjithsej 34 banesa.
Por Shefqet Gashit, nga LABI COM thonë se nuk iu dukën mjaftueshëm ato 34 banesa.
Kjo kompani nisi të ndërtojë edhe më tutje, duke tejkaluar katet e lejuara.
Kur vëllezërit Beboviq kishin marrë vesh një gjë të tillë, nuk po nënshkruanin marrëveshjet e mëtutjeshme që i duheshin Shefqet Gashit për të vazhduar punën.
Meqenëse dy nga vëllezërit jetojnë jashtë Kosovës, pronari i LABI COM kishte shkuar tek vëllai që jeton në Prishtinë, Maliq Idrizi, dhe i kishte kërkuar që të nënshkruante për të gjithë. Këtë herë, Maliqi kishte kundërshtuar një gjë të tillë.
I mbetur pa zgjidhje, Shefqet Gashi i kishte shkuar në shtëpi dhëndrit të Maliqit, me të cilin kishin bashkëpunuar e sipas Ruhanit, kishin pasur borxhe mes vete.
Dhëndrit, Shefqeti i kishte dhënë detyrë që të bindë vjehrrin e tij Maliqin që të nënshkruajë.
Sipas Ruhan Beboviq, dhëndri ia kishte mbushur mendjen vëllait të tyre, Maliqit që të nënshkruajë marrëveshjen për të gjithë. Pas atij nënshkrimi, Shefqet Gashi dyfishoi numrin e banesave në atë ndërtesë, nga 34 e çoi në 69-të.
Në këmbim të atij nënshkrimi, sipas Ruhanit, vëllait të tij Maliqit iu dyfishuan metrat katrorë dhe mori 6 banesa më shumë se ta. Ruhan e Xheladin Beboviq u shprehën se u zhgënjyen thellë nga mashtrimi që ata pretendojnë se ua bëri vëllai.
Që nga ajo ditë, ata nuk i flasin me gojë Maliqit ngase siç thonë ata “deshi që të pasurohej brenda natës”.
Ndiqni detajet në videon e mëposhtme:
