Arbërie Nagavci, deputet e Vetëvendosjes, ka pasur përgjigje pse nuk ka qeveri të tretë të Albin Kurtit, dhe jo pse Vetëvendosja nuk ka numra, por se u bënë “të gjithë bashkë…me Listën Serbe” për ta pamundësuar.
Nagavci madje nxori paralele me vitin 2021 në rrëzimin e Kurtit 1.
Postimi i plotë i Nagavcit:
Lëvizja ka qenë dhe do të mbetet përherë me qytetarët, për të mirën e vendit, për drejtësi, për barazi e zhvillim. Qytetarët e dinë këtë, ata vlerësojnë integritetin e Kryeministrit Albin Kurti, guximin e tij, ndershmërinë dhe përkushtimin e tij të palëkundur.
Falë Lëvizjes VETËVENDOSJE! dhe Kryeministrit Kurti, Qeverinë e Kosovës nuk e përcakton më Beogradi përmes Listës Serbe, ata nuk janë më faktorë në vendimmarrje.
Nuk ka më as marrëveshje koalicioni që në nenin e parë parashikojnë “… do të formohet Asociacionin brenda 3–5 muajsh”, siç ishte rasti me marrëveshjen PDK–LDK–Srpska.
Shteti nuk mund të dëmtohet për hir të pushtetit!
Sot, PDK, LDK, AAK, NISMA dhe Lista Serbe, të gjithë bashkë, pamundësuan jetësimin e vullnetit të shumicës së qytetarëve, pamundësuan formimin e Qeverisë Kurti 3. Ky është skenar që e kemi parë edhe më herët, kur u rrëzua Qeveria Kurti 1.
Por, sa herë që përpiqen të na ndalin, ne dalim edhe më të fortë.
Vazhdojmë punën, angazhimin dhe përkushtimin për vendin tonë.Për zhvillim, për drejtësi, për Republikën!Kthim prapa s’ka.
Është koha e Albin Kurtit, është koha e VETËVENDOSJES!
