ShBA do të ofrojë mbështetje “më të kufizuar” për aleatët, sipas Strategjisë së re të Mbrojtjes Kombëtare të Pentagonit, shkruan BCC.
Në një ndryshim të madh të prioriteteve të sigurisë, Departamenti i Mbrojtjes i ShBA-së tani e konsideron sigurinë e atdheut dhe Hemisferën Perëndimore – dhe jo Kinën – si shqetësimin e tij kryesor.
Versionet e mëparshme të strategjisë – të publikuara çdo katër vjet – e cilësonin kërcënimin e paraqitur nga Kina si prioritetin kryesor të mbrojtjes. Marrëdhëniet me Kinën tani do të trajtohen përmes “forcës, jo konfrontimit”, thuhet në raport.
Strategjia e mbrojtjes përforcon thirrjet e fundit nga Presidenti Donald Trump, përfshirë atë për një “ndarje më të madhe të barrës” nga aleatët në përballjen me kërcënimet e paraqitura nga Rusia dhe Koreja e Veriut.
Raporti i ri prej 34 faqesh vjen pas publikimit vitin e kaluar të Strategjisë së Sigurisë Kombëtare të ShBA-së, e cila thoshte se Europa përballej me një kolaps qytetërues dhe nuk e cilësonte Rusinë si kërcënim për ShBA-në. Në atë kohë, Moska tha se dokumenti ishte “kryesisht në përputhje” me vizionin e saj.
Për krahasim, në vitin 2018, Pentagoni i përshkruante “fuqitë revizioniste”, si Kina dhe Rusia, si “sfidën qendrore” për sigurinë e ShBA-së.
Strategjia e re u bën thirrje aleatëve amerikanë të rrisin angazhimin, duke thënë se partnerët kanë qenë “të kënaqur” që Uashingtoni të subvencionojë mbrojtjen e tyre, megjithëse mohon se ky ndryshim sinjalizon një lëvizje të ShBA-së drejt “izolacionizmit”.
“Përkundrazi, kjo do të thotë një qasje e fokusuar dhe vërtet strategjike ndaj kërcënimeve me të cilat përballet kombi ynë,” thuhet aty.
Uashingtoni ka neglizhuar prej kohësh “interesat konkrete” të amerikanëve, thotë raporti, duke shtuar se ShBA nuk dëshiron të ngatërrojë interesat amerikane “me ato të pjesës tjetër të botës – që një kërcënim për një person në anën tjetër të botës është i njëjtë me atë për një amerikan.”
Në vend të kësaj, raporti thotë se aleatët, veçanërisht Europa, “do të marrin drejtimin kundër kërcënimeve që janë më pak të rënda për ne, por më shumë për ata”.
Rusia, e cila nisi një pushtim të plotë të Ukrainës gati katër vjet më parë, përshkruhet si një “kërcënim i vazhdueshëm, por i menaxhueshëm për anëtarët lindorë të NATO-s”.
