Ish-kryetarit të Kuvendit të Kosovës, Nexhat Daci, i është dhënë lamtumira e fundit, pasi ai vdiq të enjten në moshën 81-vjeçare.
Daci është varrosur me ceremoni shtetërore në varrezat e lagjes Dragodan në Prishtinë, në praninë e krerëve të shtetit, udhëheqësve institucionalë, akademikëve, familjarëve dhe miqve.
Gjatë ditës, në nderim të tij janë mbajtur homazhe në ambientet e Kuvendit të Kosovës, ndërsa është organizuar edhe Akademi Përkujtimore.
Në këtë akademi, presidentja e Kosovës, Vjosa Osmani, e ka vlerësuar Nexhat Dacin për rolin e tij kyç në ndërtimin e shtetit dhe konsolidimin e demokracisë në Kosovë.
Ndërkaq, kryeministri në detyrë, Albin Kurti, e ka cilësuar Dacin si shembull se si duhet zhvilluar beteja politike dhe si duhet funksionuar Kuvendi i Kosovës.
