Ukraina pranoi sot propozimin e Shteteve të Bashkuara, të transmetuar nga Sekretari i Shtetit Marco Rubio, për një armëpushim 30-ditor me Rusinë, në rrugën drejt paqes përfundimtare mes palëve dhe fundit të konfliktit.
Në njoftimin e publikuar nga dy delegacionet që morën pjesë në bisedimet në Arabinë Saudite, bëhet e ditur se Shtetet e Bashkuara do t’i komunikojnë Rusisë se reciprociteti rus është çelësi për arritjen e paqes.
Po ashtu, bëhet e ditur se Shtetet e Bashkuara do të heqin menjëherë pezullimin e ndarjes së informacioneve nga shërbimet inteligjente dhe do të rifillojnë ndihmën e sigurisë për Ukrainën.
Të dy delegacionet ranë dakord të emërojnë ekipet e tyre negociuese dhe të fillojnë menjëherë negociatat për një paqe të qëndrueshme që garanton sigurinë afatgjatë të Ukrainës. Shtetet e Bashkuara u angazhuan të diskutojnë këto propozime specifike me përfaqësuesit nga Rusia.
Delegacioni ukrainas ritheksoi se partnerët evropianë do të përfshihen në procesin e paqes.
Së fundi, presidentët e të dy vendeve ranë dakord të përmbyllin sa më shpejt një marrëveshje gjithëpërfshirëse për zhvillimin e burimeve të mineraleve të Ukrainës për të zgjeruar ekonominë e saj dhe për të garantuar mirëqenien dhe sigurinë afatgjatë të Ukrainës.
“Përfaqësuesit e të dyja vendeve lavdëruan guximin e popullit ukrainas në mbrojtje të kombit të tyre dhe ranë dakord se tani është koha për të nisur një proces drejt paqes së përhershme.
Delegacioni ukrainas ritheksoi mirënjohjen e fortë të popullit ukrainas ndaj Presidentit Trump, Kongresit Amerikan dhe popullit të Shteteve të Bashkuara për mundësimin e përparimit domethënës drejt paqes.
Delegacionet diskutuan gjithashtu rëndësinë e përpjekjeve për ndihmë humanitare si pjesë e procesit të paqes, veçanërisht gjatë armëpushimit të përmendur më sipër, duke përfshirë shkëmbimin e të burgosurve të luftës, lirimin e të ndaluarve civilë dhe kthimin e fëmijëve ukrainas të zhvendosur me force”, thuhet në njoftimin e publikuar nga Qeveritë e Shteteve të Bashkuara të Amerikës dhe Ukrainës.
