Kryetari i Lidhjes Demokratike të Kosovës, Lumir Abdixhiku, ka reaguar nga Spanja lidhur me zhvillimet në Kuvend, ku dështoi sërish konstituimi dhe u bë përpjekje nga Lëvizja Vetëvendosje që votimi për kryeparlamentarin të bëhet në mënyrë të fshehtë.
Përmes një reagimi, Abdixhiku ka thënë se veprimet e tilla të VV-së janë arsyeja pse ai dhe LDK-ja kanë refuzuar ftesën e kryeministrit në detyrë, Albin Kurti, për një takim. Kjo ftesë ishte pranuar nga kryetari i PDK-së, Memli Krasniqi.
“A po e kuptoni tani, se pse me të tillët, nuk mund të kesh as takim e as mirëkuptim? Të takojnë, të mashtrojnë! Gjersa të thërrasin në takim, jashtë të ofendojnë. Në fund veprojnë në arbitraritet të plotë! Sepse nuk njohin njerëzoren, as fjalën as kurrizin!”, ka shkruar Abdixhiku.
Postimi i plotë:
A po e kuptoni tani, se pse me të tillët, nuk mund të kesh as takim e as mirëkuptim?
Të takojnë, të mashtrojnë!
Gjersa të thërrasin në takim, jashtë të ofendojnë.
Në fund veprojnë në arbitraritet të plotë!
Sepse nuk njohin njerëzoren, as fjalën as kurrizin!
Kjo politikë duhet të marrë fund! LDK do t’i japë fund!
Është interes kombëtar refuzimi i qasjes së tillë politike, jo nënshtrimi e dorëzimi para saj. Shpresoj dhe partitë tjera ta kuptojnë këtë gjë sa më parë.
LDK e ka të qartë.
Prandaj është konsistente.
Para, gjatë e pas zgjedhjeve.
Prandaj votuesi e mbështetësi i LDK-së sot rri krenar!
