Vendi është kurthuar në një ngërç të ri, ndërsa Lëvizja Vetëvendosje konsideron se ka kryer punë me Kuvendin, të cilin e quan të konstituuar edhe pa zgjedhjen e një nënkryetari nga komunteti serb.
Partitë tjera dhe ekspertët ligjorë përgjithësisht thonë se partia e Albin Kurtit, përmes kryetarit të Kuvendit, Dimal Basha, devijoi nga rendi kushtetues.
Eugen Cakolli nga koalicioni i organizatave joqeveritare, Demokracia në Veprim i tha Gazetës Express se nuk ka “as arsye kushtetuese, as objektive”, në konstatimin e Bashës të shtunën se Kuvendi është konstituuar. Kjo situatë, sipas tij, tregon vetëm “mungesën e vullnetit politik nga Lëvizja Vetëvendosje” për t’u angazhuar për formimin e një shumice të re në Kuvend dhe formimin e një qeverie të re.
“Në radhë të parë, Kuvendi nuk është i konsitutuuar. Pra, konstatimi se Kuvendi është konstituuar, perveçse pa sens politik, është juridikisht nul, në kuptimin që nuk prodhon asnjë pasojë juridike”, thotë ai.
Presidentja Vjosa Osmani, e cila të premten kërkoi që Kuvendi dhe Qeveria të bëhen “urgjentisht”, do të duhej t’i ftonte partitë politike parlamentare për konsultime dhe t’ia propozonte Kuvendit kandidatin për kryeministër, i cili do të duhej ta krijonte qeverinë e re. Kjo, vetëm nëse ajo e konsideron të konstituuar Kuvendin, sikurse LVV-ja.
Basha konstatoi të shtunën se Kuvendi kishte “ezauruar edhe pikën e katërt të rendit të ditës” – zgjedhjen e nënkryetarit nga komuniteti serb. Seancën e mbylli me thirrjen e një mbledhjeje të Kryesisë së Kuvendit për të hënën. Në të, PDK-ja dhe LDK-ja kanë thënë se s’do të marrin pjesë.
Cakolli thotë se presidentja tash “nuk ka mundësi të përfshihet”. Ai tha se Osmani nuk do të duhej ta ndërmerrte ndonjë hap që do ta kalonte situatën te zgjedhje e qeverisë.
“Presidentja, përveç takimit të nesërm, nuk do të duhej ta aktivizonte asnjë kometencë, e aq më pak të ndërmarrë ndonjë hap për dekretimin e kandidatit për kryeministër nga radha e Lëvizjes Vetëvendosje, për shkak se ka aktgjykime që theksojnë qartë se Kuvendi nuk konsituohet pa u zgjedhur të gjithë nënkryetarët”, tha ai.
Basha e mbylli seancën konstituive pasi tha se nuk pati vota për asnjërin prej kandidatëve serbë për nënkryetar të Kuvendit. Cakolli thotë se këto “nuk janë arsye kushtetuese”.
“Unë konsideroj që presidentja Vjosa Osmani, duke e njohur karakterin e saj politik, do të duhej t’i drejtohej gjykates”, tha Cakolli, duke kujtuar se në rastin paraprak, kur tërhoqi kërkesën për sqarimin e pasojave për shkak të moskonstituimit të Kuvendit brenda afatit të përfaktuar, e kishte “komprometuar” atë.
Cakolli bën thirrje që “presidentja të mos ndërrmarë hapa të tillë” në drejtim të formimit të qeverisë, por të presë. “Të pritet një vendim apo një masë nga ana e Gjykatës”, tha ai, duke supozuar se cili mund të jetë vendimi.
Lista Serbe njoftoi të shtunën se është ankuar në Gjykatën Kushtetuese të Kosovës kundër votimit ndaras për zgjedhjen e nënkryetarëve nga komunitetet pakicë gjatë seancës konstituive.
“Gjasat më të medha janë që Gjykata të dalë me masë të përkohshme”, thotë Cakolli. Kjo, sipas tij, do t’i parandalonte pasojat e tjera.
Veprimet e Osmanit me caktimin e mandatarit, Cakolli tha se do të përbënin “shkelje të renda kushtetuese”.
Mbledhja e Kryesisë së Kuvendit e thirrur për nesër, Cakolli thotë se “do të jetë më shumë për konsum politik”.
