Kandidati i PDK-së për kryeministër, Bedri Hamza, ka anuluar takimin me mërgatën, i cili ishte paraparë të mbahej sonte në Vjenë.
Ai ka bërë me dije se këtë e ka bërë për shkak të ngjarjeve të fundit në veri.
Në profilin e tij në “Facebook”, Hamza ka shkruar se takimin e ka anuluar për t’ju qëndruar pranë qytetarëve në këtë periudhë të ndjeshme.
“Bashkatdhetarëve të mi në Austri, të cilët sonte kisha planifikuar t’i takoj, ju kërkoj ndjesë për mungesën time në tubimin e sotëm në Vjenë. Për shkak të ngjarjeve në veriun e vendit, që kanë shkaktuar pasoja të rënda, kam anuluar pjesëmarrjen për t’ju qëndruar pranë qytetarëve në këtë periudhë të ndjeshme. E di se bashkatdhetarët tanë po bashkëndjejnë në këto momente me ne, siç jam i sigurt që do të takohemi së shpejti në ditë më të mira për qytetarët tanë, mërgatën dhe Kosovën. Ju falënderoj për mirëkuptimin!”, ka shkruar Hamza.
