Në Gjykatën Themelore në Mitrovicë ka nisur seanca për caktimin e masës së paraburgimit për policin e arrestuar Murat Latifi, raporton Veriu.info.
Ai po dyshohet për për kryerjen e veprave penale “Keqpërdorimi i pozitës apo autoritetit zyrtar”, “Zbulimi i fshehtësisë zyrtare”, “Mbajtja në pronësi, kontroll ose posedim të paautorizuar të armëve”, dhe “Përdorimi i armës apo mjetit të rrezikshëm”.
Pamje nga sjella e policit të arrestuar nē gjykatë
Në kërkesën për caktimin e masës së paraburgimit Prokuroria ka bërë të ditur se polici Murat Latifi se me datë 02 shtator 2025 në fshatin Ropicë të Vushtrrisë, me dashje e duke e shfrytëzuar detyrën dhe autoritetin zyrtar si zyrtar policor, me qëllim të përfitimit të dobisë pasurore për vete dhe personin tjetër, shkon tek shtëpia e të pandehurit K.M., dhe e merr dhe e largon nga shtëpia duke shkuar në drejtim të Prishtinës, raporton Veriu.info.
Foto: Polici Murat Latifi
Sipas prokurorisë, ai me datë 18 qershor 2025 kontaktohet përmes telefonit nga i pandehuri K.M., i cili e vëren një dron mbi shtëpinë e tij dhe e pyet të pandehurin policin Murat Latifi se a është duke u hetuar nga policia, i dyshuari – zyrtar policor e informon se në rast kur ai është duke u hetuar ose të ketë veprime tjera do ta njoftojë.
Ndryshe, i gjithë ky rast ka të bëjë me hetimet e nisura për anëtarë të familjes Gerbeshi nga Vushtrria, të cilët po hetohet për përfshirje në disa vepra të rënda penale./Veriu.info
