Arif Krasniqi është arrestuar nën dyshimin për veprën penale “Pjesëmarrja ose organizimi i grupit kriminal të organizuar” lidhur me veprën penale “Falsifikimi i dokumentit”. Ndaj tij është kërkuar edhe caktimi i masës së paraburgimit. Ai fillimisht ishte paraqitur si dëshmitar, e më pas kishte rënë në duart e organeve të rendit.
Pas arrestimit të Flamur Krasniqit, Arifi, babai i tij, ishte ftuar nga hetuesia për intervistim. Ai kishte thënë për policinë se nuk ka qenë në dijeni për aktivitetin që po kryente i biri i tij, raporton Insajderi.
Më pas, me qëllim të sigurimit të ndonjë prove, me urdhër të prokurorit Arif Krasniqit iu kishte sekuestruar telefoni, sipas dosjes së Prokurorisë Speciale.
Në galerinë e telefonit të tij janë gjetur 85 fotografi të dokumenteve me të dhëna të huaja. 23 nga to janë të bëra me dorëza, për të cilat Prokuroria Speciale ka dyshuar se janë realizuar në laboratorin ku është kryer aktiviteti kriminal.
“Gjithashtu gjatë ekzaminimit vërehet se i ka fshirë aplikacionet në telefonin e tij, si dhe bisedat që i ka zhvilluar në këtë kohë me persona të ndryshëm”, thotë Prokuroria në dosjen që e ka parë Insajderi.
Arif Krasniqi po dyshohet për veprën penale “Pjesëmarrja ose organizimi i grupit kriminal të organizuar” lidhur me veprën penale “Falsifikimi i dokumentit”.
I pandehuri në fjalë ishte pjesëtar i Ushtrisë Çlirimtare të Kosovës (UÇK), me nofkën “Muja”. Ai ishte në mesin e 157 emrave të ish-pjesëtarëve të UÇK’së që po kërkoheshin nga Serbia nëpërmjet INTERPOL-it.
Djali i tij, Flamur Krasniqi, është arrestuar në janar të këtij viti teksa po barte me një pikap të bardhë material që dyshohet se po shkonte për në laboratorin e falsifikimit të dokumenteve personale. /Insajderi/Veriu.info
