Rreth 1,528 kilogramë mish pule, i kontaminuar me bakterin Salmonella, është zbuluar në depon e fabrikës për përpunimin dhe prodhimin e produkteve të mishit “Medina” në Prizren. Agjencia e Ushqimit dhe Veterinarisë (AUV), gjatë një inspektimi të kryer në fillim të muajit qershor në thertoren e kompanisë, ka konstatuar praninë e bakterit në mishin e pulës të importuar nga kompania rumune “Agricola International S.A”. Me vendim të AUV mishi është asgjësuar.
Më 9 qershor 2025, AUV mori vendim që kompania “Medina SHPK” të asgjësojë ose ta kthejë në vendin e origjinës mishin e kontaminuar, sasia e të cilit arrinte në 1,528.00 kilogramë. Bakteri Salmonella spp, i gjetur në këtë mish, është i rrezikshëm dhe i ndaluar për konsum njerëzor.
Gazeta Insajderi, përmes një kërkese për qasje në dokumente zyrtare, ka siguruar vendimin e AUV-së ndaj kompanisë.
Sipas këtij vendimi, gjatë kontrollit në depo, inspektorët kanë hasur në lëndën e parë të mishit të pulës (MDM) me numrin e lotit 2215130, e cila ruhej në temperaturë -18°C.
“Pas pranimit të njoftimit nga RASFF, është inspektuar ndërmarrja Medina SHPK. Në depo është gjetur lënda e parë – mish pule (MDM) me lotin 2215130, në sasi prej 1,528 kg, e cila ruhej në temperaturë -18°C. Në këtë mish, i prodhuar nga SC Agricola International S.A. në Rumani, analizat laboratorike kanë zbuluar praninë e Salmonella spp., prandaj konsiderohet i papërshtatshëm për konsum human. Lënda është veçuar dhe bllokuar për përdorim, deri në një vendim të ri. Gjatë inspektimit është përpiluar procesverbali nr. 002948 dhe janë bërë fotografi të produktit të bllokuar”, thuhet në dokumentin zyrtar të AUV-së.
Pas vendimit të AUV-së, kompania “Medina” ka asgjësuar mishin në prani të inspektorëve të Agjencisë së Ushqimit dhe Veterinarisë dhe të Administratës Tatimore të Kosovës (ATK).
Në një përgjigje për gazetën Insajderi, kompania e ka konfirmuar se në depot e saj është gjetur një sasi prej 1,428 kilogramë mish pule e kontaminuar me Salmonella.
“Pas marrjes së rezultateve është konstatuar prania e bakterit Salmonella. Autoritetet e AUV-së, sipas procedurave, kanë marrë vendim për asgjësim ose kthim të mallit në vendin e origjinës. Procedurat, dispozitat ligjore dhe urdhrat e AUV-së janë respektuar me përpikëri. Kjo sasi e mishit është asgjësuar në tërësi në prani të inspektorëve të Agjencisë së Ushqimit dhe Veterinarisë si dhe inspektorëve të Administratës Tatimore të Kosovës”, thuhet në deklaratën e kompanisë.
“Medina SHPK”, e cila merret me përpunimin dhe prodhimin e produkteve të mishit, ka selinë në Prizren. Sipas të dhënave nga Agjencia për Regjistrimin e Bizneseve të Kosovës (ARBK), pronar i saj është Hylki Murati.
Para një jave Veriu.info ka raportuar ekskluzivisht se edhe mishi i kompanisë “Meka Halal Food” kishte rezultuar pozitiv me bakterin salmonelë.
