Presidentja e Republikës së Kosovës, Vjosa Osmani, ka njoftuar mbrëmjen e sotme nga Turqia, se Sudani është shteti më i ri që ka njohur pavarësinë e Kosovës, shkruan Gazeta Sinjali.
Kjo njohje është pritur me entuziazëm nga spektri politik opozitar në vend, ku një sërë liderësh dhe përfaqësuesish të partive opozitare kanë reaguar menjëherë, duke e cilësuar një hap pozitiv dhe të rëndësishëm për forcimin e subjektivitetit ndërkombëtar të Kosovës.
Në të kundërt, nga ana e Qeverisë në detyrë nuk ka pasur ende ndonjë deklaratë zyrtare lidhur me këtë zhvillim të rëndësishëm. Kryeministri Albin Kurti, ministrja e Jashtme në detyrë, Donika Gërvalla dhe kryeparlamentari, Glauk Konjufca nuk janë prononcuar deri më tani për këtë njohje të re nga shteti afrikan.
Pas një ‘pauze’ prej gati katër vjetësh, Kosova ka marrë dy njohje të reja ndërkombëtare, duke çuar numrin e shteteve që e njohin pavarësinë e saj në 119, ku të dyja njohjet e reja vijnë nga shtete afrikane, që së bashku përfaqësojnë mbi 100 milionë banorë.
