Një përplasje verbale në distancë ka ndodhur sot gjatë seancës konstituive të 45-të të Kuvendit të Kosovës, mes deputetëve të Aleancës për Ardhmërinë e Kosovës dhe atyre të Lëvizjes Vetëvendosje.
Fillimisht u raportua se deputetja e AAK-së, Time Kadrijaj, i ishte drejtuar me shprehjen “merre terapinë” deputetes Saranda Bogujevci të VV-së.
Por Kadrijaj në prononcim për Insajderin e ka mohuar këtë.
Kadrijaj ka sqaruar se nuk ka pasur asnjë debat me Bogujevcin, dhe se shprehja që u dëgjua në Kuvend ishte drejtuar ndaj deputetes tjetër të VV-së, Fitore Pacolli, me të cilën kishte pasur një përplasje.
“Është një keqkuptim krejt. Me Sarandën nuk kam pasur kurgjo. Ajo ka reaguar sepse unë me Fitoren diskutojsha – se ajo, prej ulëses si gjithmonë, duke bërtit në çdo seancë për secilin deputet. Ajo bërtet e frustruar, bën me gjestikulacione për me na ndalë dhe nuk na lë as 30 sekonda. Duke e parë kështu, iu kam drejtuar Fitores në atë kuptimin që, në ngritje të tensionit, qohesh e bërtet qashtu, e i kam thënë ‘mos ki probleme me tension që po qohesh, thashë merre terapinë, e qetësohu”, tha Kadrijaj.
Ajo shtoi se Bogujevci është përfshirë vetë në situatë, pa qenë pjesë e përplasjes, duke reaguar me të bërtitura.
