Presidentja Vjosa Osmani sot nga ora 12:00 do t’i presë në zyrën e saj liderët e partive politike për konsultim pasi mandatari i parë, Albin Kurti i partisë fituese Lëvizja Vetëvendosje, dështoi t’i fitonte votat e mjaftueshme në Kuvend të dielën për ta zgjedhur qeverinë e re.
Takimin e ka konfirmuar dje këshilltari për media i presidentes, Bekim Kupina.
Pjesëmarrjen në këtë takim e kanë konfirmuar të gjitha partitë.
Nënkryetarja e Vetëvendosjes, Albulena Haxhiu, dje pas një mbledhje të Kryesisë së Kuvendit, në përgjigje të pyetjes nëse do të ketë një mandatar të ri nga Lëvizja Vetëvendosje, tha se këtë qëndrim do ta shpalosin sot në takimin me Osmanin.
Ndërkaq, kryetari i partisë së dytë fituese, Memli Krasniqi, të dielën e hodhi poshtë mundësinë që të bëhet mandatar i radhës në rast se presidentja do ta pyeste nëse e ka shumicën.
Sipas Kushtetutës, Osmani duhet të caktojë një mandatar tjetër për formimin e qeverisë brenda 10 ditësh nga dështimi i mandatarit të parë.
Megjithatë, ky takim u pa si një shtrim rruge për zgjedhje të reja meqë nuk ka shenja për krijim të shumicës parlamentare.
Këshilltari i Osmanit tha se në konsultat që do t’i zhvillojë me partitë politike, presidentja do ta potencojë rëndësinë e miratimit të Buxhetit për vitin 2026 si dhe miratimin e Planit të Rritjes, si akte të domosdoshme për stabilitetin institucional dhe funksionimin normal të shtetit si dhe për zhvillimin ekonomik të vendit tonë.
Por, kalimi i buxhetit me një qeveri në detyrë nuk mund të bëhet, sipas njohësve.
Analisti politik, Albert Krasniqi, dje duke cituar Ligjin për Qeverinë dhe se kjo gjë është e parritshme ligjërisht dhe se e vetmja mënyrë se si mund të miratohet buxheti është dakordimi i partive politike për një qeveri teknike – ide të cilën e kundërshton Lëvizja Vetëvendosje.
“Ligji për Qeverinë, neni 31, përcakton kufizimet që zbatohen për një Qeveri në dorëheqje. Sipas pikës 5 të këtij neni, këto kufizime vlejnë edhe për Qeverinë e cila ka përfunduar mandatin katërvjeçar të Kuvendit, pra për Qeverinë në detyrë. Në mesin e këtyre kufizimeve (paragrafi 1, nënparagrafi 1.2) përfshihet edhe ndalimi për miratimin e projektligjeve. Paragrafi 2 i të njëjtit nen bën një përjashtim të vetëm për Qeverinë në dorëheqje, duke i lejuar asaj që t’i propozojë Kuvendit miratimin e Buxhetit Vjetor. Një përjashtim i tillë nuk ekziston për Qeverinë në detyrë, gjë që nënkupton se kjo e fundit nuk mund të propozojë as projektligjin për buxhetin, e aq më pak projektligje të tjera”, shpjegoi Krasniqi.
Kupina shtoi gjithashtu se presidentja do të bëjë thirrje për një kompromis politik, nëpërmjet të cilit “do të garantohet interesi i Kosovës dhe i qytetarëve të saj, si dhe të sigurohet rruga përpara për avancimin e vendit”.
“Në këtë kuadër, Presidentja do t’i inkurajojë partitë politike të bashkëpunojnë për ta shmangur çdo bllokadë që mund të ndikojë negativisht në mirëqenien e qytetarëve dhe në funksionimin e institucioneve të Republikës së Kosovës”, ka thënë Kupina për takimin e sotëm./Express/
