Presidentja e Kosovës, Vjosa Osmani, është deklaruar rreth seancës konstituive të Kuvendit duke thënë se partitë politike kanë kohë të mjaftueshme që t’i kryejnë diskutimet e nevojshme, shkruan Gazeta Express.
Osmani para mediave ka uruar deputetët që ky proces të shkojë sa më mirë dhe se konstituimi të kryhet në datën e caktuar.
‘‘Përgjegjësitë e mija kushtetuese janë që ta thërras këtë seancë konstitutive. Besoj që qe nga dita e certifikimit të rezultateve deri në momentin kur mbahet seanca konstituive veç se ka kohë të mjaftueshme që partitë politike t’i kryejnë diskutimet e nevojshme. Po ashtu për organizuesit e seancës konstituive siç e dini Kuvendi duhet të bëj një sërë regjistrimesh përgatitjesh teknike, ka kohë të mjaftueshme. Unë i uroj sukses partive politike, i uroj sukses Kuvendit të Kosovës që ai proces të shkoj sa më mirë që është e mundshme dhe që konstituimi të kryhet po me atë datë’’, ka thënë ajo.
Tutje, Osmani ka deklaruar kjo çështje u takon partive politike, edhe pse në të kaluarën ‘’mund të ketë pasur president që janë përzier në çështje të koalicioneve’’.
‘‘Siç e dini si presidente nuk kam të drejtë vote, dhe pavarësisht që në të kaluarën mund të ketë pasur president që janë përzier në çështje të koalicioneve unë i konsideroj ato çështje partiake që sipas Kushtetutës nuk janë detyrë e imja, por jam besimplotë që institucionet përkatëse përkatësisht deputetët e Kuvendit të Kosovës do të bëjnë çmos që kjo të jetë seancë e suksesshme’’, ka shtuar ajo.
Pos kësaj, ajo ka thënë se duke i parë zhvillimet gjeopolitike duhet që sa më parë që të ketë qeveri të re, pasi që siç ka theksuar presidentja ‘‘nuk është që globi na pret neve’’.
‘‘Është më rëndësi për qytetarët e Kosovës, ju po i shihni zhvillimet gjeopolitike, nuk është që globi na pret neve kështu që është më rëndësi sa më parë që të jetë e mundur, brenda afateve kushtetuese të kemi qeverinë e Republikës, së pari konsitutimin e Kuvendin që është hap i parë e pastaj qeverinë e Republikës së Kosovës. Një kuvend funksional që e kryen edhe punën e mbikëqyrjes në raport me qeverinë, sepse Kosova ka shumë punë për të bërë, prandaj edhe njëherë unë dua të u uroj suksese deputetëve të Kuvendit të Kosovës’’, ka deklaruar para mediave ajo.
Seanca e thirrur nga Osmani për konstituimin e Kuvendin është me 15 prill.
