Partia në pushtet në Japoni zgjodhi të shtunën ish-ministren për Sigurinë Ekonomike, Sanae Takaichi, si udhëheqësen e saj të re, duke e bërë të mundshme që ajo të bëhet kryeministrja e parë grua e Japonisë.
Në një vend që renditet dobët në nivel ndërkombëtar për barazinë gjinore, Takaichi do të bënte histori si gruaja e parë që udhëheq Partinë Liberal Demokratike konservatore, që ka qeverisur Japoninë për një kohë të gjatë. Ajo është një nga anëtaret më konservatore të kësaj partie të dominuar nga burrat.
Takaichi mundi Ministrin e Bujqësisë, Shinjiro Koizumi — djali i ish-kryeministrit të njohur Junichiro Koizumi — në një raund të dytë votimi brenda partisë së LDP-së të shtunën.
Ajo zëvendëson Kryeministrin Shigeru Ishiba, ndërsa partia shpreson të rifitojë mbështetjen e publikut dhe të qëndrojë në pushtet pas humbjeve të mëdha në zgjedhje, shkruan CNN, transmeton Gazeta Express.
Ajo ka shumë gjasa të bëhet kryeministrja e ardhshme e Japonisë, pasi partia e saj mbetet bindshëm më e madhja në dhomën e ulët të parlamentit, e cila përcakton udhëheqësin kombëtar dhe sepse grupet opozitare janë shumë të fragmentuara.
