Javën e kaluar Veriu.info ka raportuar ekskluzivisht se si KFOR-i ka mbyllur gropat e hapura nga Policia e Kosovës në veri në zonën kufitare me Serbinë, mbyllja e të cilave iu mundëson kalimin me automjete kontrabanditësve në këto pjesë,
Tri ditë pas publikimit të reportazhit nga Veriu.info, këto dy institucione kanë bërë një ushtrim të përbashkët në këtë pjesë të shtetit.
“Sot, Policia e Kosovës zhvilloi një ushtrim të koordinuar me KFOR-in, i cili u realizua në zonën e veriut të Republikës së Kosovës. Ushtrimi kishte për qëllim demonstrimin e ndërveprueshmërisë dhe koordinimit të lartë ndërmjet të dy institucioneve të sigurisë.
Ky aktivitet ishte rezultat i një planifikimi të kujdesshëm dhe ekzekutimi të suksesshëm, duke reflektuar afërsinë institucionale dhe përpjekjet e koordinuara për të garantuar një ambient të sigurt, si dhe për të siguruar një reagim të shpejtë dhe efikas ndaj çdo sfide të mundshme në aspektin e sigurisë”, thuhet në komunikatën e Policisë së Kosovës.
Në reportazhin e publikuar nga Veriu.info, KFOR-i ka pranuar zyrtarisht se ka mbyllur këto gropa, të cilat Policia e Kosovës i kishte hapur nëpër rrugët ilegale që shfrytëzonin kontrabandistët për hyrje në Kosovë, rrugë të cilat i kanë përdorë edhe për të organizuar sulmin e Banjskës./Veriu.info
