Gjatë ditës së djeshme, IndeksOnline raportoi për rrezikun që institucionet shëndetësore publike, veçanërisht Spitalet Rajonale dhe QKUK, të mbesin pa staf të fushës së Teknologjisë së Informacionit (IT). Shkak kryesor për këtë situatë mbeten pagat e ulëta dhe koeficienti i pamjaftueshëm i përcaktuar me Ligjin e Pagave.
Sipas burimeve të IndeksOnline, në spitalet e Gjakovës, Pejës dhe Mitrovicës, disa punonjës të IT-së tashmë janë larguar nga puna, ndërsa situata pritet të përkeqësohet edhe në dy spitale të tjera rajonale dhe në QKUK, ku punonjësit e IT-së po shqyrtojnë dorëheqjen e tyre.
Me të njëjtën sfidë po ballafaqohen edhe komunat e vendit.
Sipas kryesuesit të Kolegjiumit të zyrtarëve të IT-së së komunave, në Asociacionin e Komunave të Kosovës, Ukë Krasniqit, profesionistët e IT-së “janë mashtruar” nga qeveria.
Krasniqi deklaroi për IndeksOnline se ata që punojnë në këtë fushë nuk kanë përfituar deri më tani asnjë cent në rritje të pagës, nga hyrja në fuqi e Ligjit të ri të pagave.
“Përjashtimi i IT-së së komunave nga listat e ekspertëve, është goditje e madhe për ne. Me këtë mospërfillje, kemi mbetur kategoria më e përbuzur dhe më e diskriminuar në institucionet komunale, ani pse i gjithë institucioni varet nga puna jonë profesionale e teknologjisë informative. Komunat tani mund të përballen me një problem shumë serioz: mos ofrimi i shërbimeve profesionale dhe dorëheqje masive nga pozitat e IT-së. Dhe ky është një zhvillim që mund të shkaktojë pasoja tepër të rënda për administratën lokale dhe ofrimin e shërbimeve për qytetarë”, deklaroi Krasniqi.
Sipas tij, ky “mashtrim” duhet adresuar me urgjencë për veprim të menjëhershëm për të drejtat ligjore të profesionistëve të IT-së.
“Nuk mund të lejojmë që të injorohet puna dhe kontributi i njerëzve të kualifikuar dhe me përvojë të madhe të cilët mbajnë sistemet kompjuterike e që e bëjnë administratën të funksionojë. Profesionistët e IT-së në komuna janë të pazëvendësueshëm dhe pa ata, komunat do të përballen me pasoja të rënda në ofrimin e shërbimeve për qytetarë” shtoi Krasniqi.
Ai deklaroi se nga ky trajtim, shumë zyrtarë të kësaj fushë janë larguar nga detyrat e tyre nëpër komuna, e shumë të tjerë kanë paralajmëruar të njëjtin veprim.
