Sekretari Amerikan i Shtetit, Marco Rubio, ka deklaruar të mërkurën se palët e përfshira në krizën e fundit në Siri kanë rënë dakord për hapa konkretë për ndaljen e dhunës, pas sulmeve ajrore izraelite dhe trazirave me bazë sektare në qytetin Suweida.
“Ne kemi rënë dakord për hapa specifikë që do ta çojnë këtë situatë shqetësuese dhe të tmerrshme në fund sonte”, shkroi Rubio në një postim në platformën “X”.
Sipas tij, angazhimet e marra duhet të përmbushen nga të gjitha palët: “Kjo do të kërkojë që të gjitha palët të përmbushin angazhimet që kanë marrë dhe kjo është ajo që presim plotësisht që ato të bëjnë”.
Rubio nuk dha detaje se cilat palë ishin të përfshira në bisedime apo se çfarë masash të sakta ishin rënë dakord.
Ndërkohë, zëdhënësja e Departamentit të Shtetit, Tammy Bruce, në një konferencë për shtyp kërkoi që forcat siriane të tërhiqen nga zonat e përfshira nga trazirat, me qëllim që të lehtësohet de-eskalimi.
“Ne po i bëjmë thirrje qeverisë siriane që, në fakt, të tërheqë ushtrinë e saj në mënyrë që të gjitha palët të mundësojnë de-eskalimin dhe të gjejnë një rrugë përpara,” tha Bruce.
“Ky është padyshim qëllimi, për shkak të natyrës së asaj që ka ndodhur. Sekretari e formuloi këtë si një keqkuptim.”.
