Vëllazëri politike e fetare mes Rusisë dhe Serbisë si dhe mesazhe për ‘botën serbe’ ka përcjell takimi i djeshëm në Moskë mes kryetarit të Rusisë, Vladimir Putin dhe kreut të Kishës Ortodokse Serbe, patriarkut Porfir.
Kreu i shtetit rus, siç përcjell shërbimi i shtypit të Kremlinit, ka pritur në takim të përbashkët patriarkun e Moskës dhe Gjithë Rusisë, Kiril si dhe atë të Serbisë, Porfir, transmeton NACIONALE.
Në takim kanë marrë pjesë edhe metropoliti Antoni i Volokolamskit si dhe metropoliti Irinej.
Gjatë këtij takimi, Putini ka thënë se Rusia është në dijeni për gjendjen e vështirë në Ballkan.
“Ne e dimë se gjendja në Ballkan nuk është e thjeshtë, dhe ne jemi në dijeni për përpjekjet tuaja për ta fuqizuar pozitën e Serbisë, përfshirë rëndësinë e një këshilli gjithëserb”, ka thënë ai.
Kreu i Rusisë, më tej, ka thënë se pret që më 9 maj presidenti serb, Aleksandër Vuçiq, ta vizitojë Moskën për ceremonitë që do të mbahen në kuadër të shënime për nder të Ditës Patriotike.
Ndërsa ka uruar për Pashkët, ai ka theksuar se lidhjet ruso-serbe gjithmonë kanë pasur një karakter të veçantë.
“Kjo është arsyeja, mes shumë gjërave, që ne jemi të lidhur me rrënjë të forta e të thella shpirtërore”, ka thënë Putin.
Në anën tjetër, patriarku serb Porfir ka thënë se marrëdhëniet mes kishave ruse e serbe kanë qenë gjithmonë aso të dashurisë e bashkëpunimit.
“Duhet të thuhet përsëri se populli serb e sheh popullin rus si të njëjtë. Ndonjëherë mund të jetë që shpresa e serbëve është e madhe, shpresë që varet më shumë në Rusinë e politikën ruse sesa në politikën serbe”, ka thënë kryepari i Kishës Ortodokse Serbe.
Duke mos lënë pa përmendur edhe Kosovën, ai ka shprehur mirënjohjen për gjithçka Putini ka bërë për pozicionin serb kundrejt Kosovës, Republikës Serbe dhe Malit të Zi.
“Ju e dini fort mirë se pa mbështetjen tuaj dhe të Kinës, unë nuk e di se çfarë do të ndodhte në Kosovë”, ka shtuar patriarku Porfir.
“Ne kërkojmë prej teje ta mbani këtë qëndrim e të bëni gjithçka është e mundur. Sepse, pavarësisht politikës, njerëzve e lajmeve, pa Kosovën e Republikën Serbe, populli serb nuk ka perspektivë.”
Kreu i Kishës serbe ka shtuar se sa i përket Kosovës, Republikës Serbe dhe Malit të Zi, gjithçka varet prej pozitës së Federatës Ruse në nivel global.
“Dëshira ime dhe dëshira e shumicës në kishën tonë është që në të ardhmen, nëse ka një demarkacion të ri gjeopolitik, ne do të jemi më afër mjedisit rus”, ka shtuar patriarku Porfir.
