Pas takimit me kandidaten e AAK-së, Valon Prebreza, kandidati i Vetëvendosjes për kryetar të Komunës së Fushë Kosovës, është parë sërish në një takim të ngjashëm këtë herë me kundërkandidatin e tij nga PDK, Rrahim Tërnavën.
Gazeta Infokus ka siguruar pamje nga ky takim, i cili është zhvilluar të martën në lokalin “Such Caffe” në qendrën tregtare Royal, në rrugën B të Prishtinës. Prebreza, i cili në zgjedhjet e 12 tetorit doli i pari me 45.15% të votave, duket se po intensifikon takimet për arritjen e koalicioneve lokale para përballjes së madhe në balotazhin e 9 nëntorit, ku do të përballet me kandidatin e LDK-së, Besnik Osmanin, i cili mori 36.66% të votave.
Vetëm një ditë para këtij takimi, Prebreza ishte parë në një tjetër takim me kandidaten e AAK-së në këtë komunë, Vildane Latifi, e cila në zgjedhje kishte përfunduar e katërta me vetëm 1.20% të votave. Mirëpo ndryshe nga takimi me Latifin me të cilën publikoi pamje në rrjetet e tij sociale këtë nuk e bëri edhe për takimin me kandidatin e PDK-së, Tërnavën. Madje Prebreza konfirmoi dje në media se do të kishte një takim me Tërnavën e PDK-së, siç duket pasi ky takim vetëm ishte kryer.
