Koha për zgjedhjen e presidentit të ri të vendin po mbaron, dhe bashkë me të, edhe durimi i partisë në pushtet, Lëvizjes Vetëvendosje, për t’iu përmbajtur Kushtetutës së Kosovës.
Për manovrat e Lëvizjes Vetëvendosje rreth procesit të zgjedhjes së Presidentit ka ngritur alarm njohësi i sistemit juridik të vendit dhe njëherësh deputeti i Partisë Demokratike të Kosovës, Përparim Gruda.
Në emisionin “Pressing”, Gruda lëshoi paralajmërime serioze ku, sipas tij, po synohet “cenimi i rendit kushtetues” përmes shkeljes së afatit të Presidentit.
“Plani që po diskutohet prej Lëvizjes Vetëvendosje për të mos thirrë seancë as nesër, unë mendoj që shënon të përmbysjes të rendit kushtetues të Kosovës.
Synohet pra që të përmbyset rendi kushtetues duke e shkelë afatin për zgjedhjen e Presidentit.” – deklaroi Gruda.
Duke u thirrur në afatet e përcaktuara nga ligji suprem i shtetit, deputeti i PDK-së tha se kalimi i afatit prej 30 ditësh para skadimit të mandatit të presidentit aktual nënkupton konsumim përfundimtar të procesit.
Rrjedhimisht, ai tha se institucioni i Presidencës të premten duhet të ndërmarrë hapat e nevojshëm për shpalljen e zgjedhjeve të parakohshme paralamentare.
“Ajo që duhet të ndodhë të premten është që Presidentja duhet me i thirrë të premten partitë politike në konsultim dhe me i shpall zgjedhjet e reja parlamentare sepse kjo është konsumim i procesit të zgjedhjes së Presidentit.
Kushtetuta ka vendosë një afat; ka thënë duhet 30 ditë para skadimit të mandatit të Presidentit aktual. Përtej këtij afati, nuk mund të ketë zgjedhje të Presidentit, prandaj mendoj që duhet të shpallen zgjedhjet e reja.” – shtoi ai.
Kujtojmë se Lëvizja Vetëvendosje ka vendosur vetëm një kandidat për president, dhe konstatuar se “nuk mund të thirrim seancë sepse duhen dy”.
