Kryetari i Prishtinës, Përparim Rama, ka njoftuar se komuna ka dërguar një shkresë zyrtare Ministrisë së Financave për të kërkuar zhbllokimin e buxhetit të kryeqytetit.
Në një postim në Facebook, Rama thekson se ndalimi i buxhetit të Prishtinës është pasojë e vendimeve politike të ministrit në detyrë të Financave, Hekuran Murati. Ai e drejtoi një mesazh të drejtpërdrejtë Muratit, duke shkruar: “Hekuran Murati, boll me lojëra politike. Zhblloko buxhetin e kryeqytetit.”
Rama e akuzoi Muratin për përpjekje për të manipuluar narrativën publike dhe për të larguar përgjegjësinë nga vetja.
“Çka po ndodh me buxhetin e Prishtinës është rezultat i vendimeve të tua politike, i askujt tjetër! Çdo status që shkruan në Facebook nuk është tjetër veçse një përpjekje e lodhur për të zhvendosur fajin,” tha Rama.
Ai shtoi se komuna ka dërguar një shkresë tjetër zyrtare Ministrisë së Financave, pasi buxheti i Prishtinës për vitin 2025, i përfshirë në Ligjin për Ndarjet Buxhetore, vazhdon të mbetet i bllokuar.
“Për këtë, përgjegjësia politike është e JOTJA!” theksoi ai.
Rama po ashtu tha se Prishtina nuk do të mbahet peng i kalkulimeve politike, duke theksuar se 33 milionë euro janë të bllokuara, përfshirë 23 milionë euro të hyra vetanake dhe 10 milionë euro grant qeveritar. Ai e cilësoi këtë veprim si të papranueshëm dhe në kundërshtim me logjikën e qeverisjes dhe funksionimin e pushtetit lokal.
“Ta kesh të qartë: asnjë status, asnjë justifikim dhe asnjë tentativë për t’u fshehur pas retorikës politike nuk do të të shpëtojë nga përgjegjësia publike për këtë situatë. Kryeqyteti nuk do të mbahet peng i kalkulimeve politike të askujt, as tënde!” përfundoi ai.
