Po bëhen thuajse një vit prej kur Komisioni i Bashkimit Evropian, ka vendosur një pako masash ndaj Kosovës.
Njëra nga kërkesat e BE-së, për heqjen e masave ishte mbajtja e votimeve në veri, prillin e këtij viti, por përkundër saj, masat po vazhdojnë të mbesin akoma në fuqi dhe deri më tani s’ka ndonjë lëvizje sa i përket se kur do të hiqen ato.
Lidhur me heqjen e masave të BE-së ndaj Kosovës, ka folur ekskluzivisht për FrontOnline, zëdhënësi i Bashkimit Evropian.
Zëdhënësi i Bashkimit Evropian, Peter Stano, për FrontOnline, ka deklaruar se Bashkimi Evropian, është i gatshëm të i heq masat për Kosovën.
Stano, thotë se për këtë ka një konkluzion të Këshillit të Çështjeve të Përgjithshme.
‘’Në konkluzionet e tij të 12 dhjetorit 2023, Këshilli i Çështjeve të Përgjithshme rikujtoi se BE-ja është e gatshme të heqë masat ndaj Kosovës në rast të përparimit të mëtejshëm në përmbushjen e kërkesave të BE-së të shprehura në deklaratën e 3 qershorit 2023’’ thotë Stano.
Ai deklaron se autoritetet e Kosovës e dijnë se çfarë duhet të bëjnë për heqjen e masave.
‘’Autoritetet e Kosovës e dinë shumë mirë se çfarë duhet të bëjnë’’
Stano, deklaron se Këshilli i Shteteve Anëtare të BE-së, ka ftuar përfaqësuesin e lartë të Bashkimit Evropian, Josep Borrell, që të preznatoj një raport mbi përmbushjen e kërkesave të BE-së, ndaj Kosovës, raport ky sipas tij është ende në finalizim dhe se thotë që së shpejti do të paraqitet tek shtetet anëtare të këshillit.
‘’Këshilli (Shtetet Anëtare të BE-së) ftoi Përfaqësuesin e Lartë Borrell që të prezantojë një raport mbi përmbushjen nga Kosova të kërkesave të BE-së. Raporti është ende në finalizim dhe së shpejti do t’u paraqitet Shteteve Anëtare në Këshill’’ deklaron zëdhënësi i BE-së për FrontOnline.
Komisioni Evropian, vitin e kaluar kishte vendosur një pako masa si ndëshkuese ndaj Kosovës, sipas tyre për shkak të përshkallëzimit të situatës së sigurisë në veri të shtetit.
Masat e vendosura nga BE-ja ndaj Kosovës përfshinin: suspendimin e përkohshëm të grupeve punuese për Marrëveshjen e Stabilizim Asociimit, mosftesën e Kosovës në takime të nivelit të lartë dhe suspendimn e vizitave bilaterale.
Gjithashtu, u suspendua edhe programimi i fondeve për Kosovën, të cilat ishin paraparë të dorëzoheshin përmes Kornizës së Investimeve në Ballkanin Perëndimor dhe IPA 2024 (Intrumentet e Para-Anëtarësimit)/FrontOnline/
