Albana Bytyqi, ish deputete e Aleancës për Ardhmërinë e Kosovës, në një prononcim për GazetaBlic, ka reguar pas pezullimit të dialogut strategjik nga ShBA, duke e quajtur këtë një sinjal të qartë të prishjes së partneritetit më të rëndësishëm të vendit dhe alarm të kuq për secilin qytetar, raporton GazetaBlic.
“Ky është një alarm i kuq për secilin qytetar, sepse kur prishet besimi me SHBA-në, humbet garancia kryesore e sigurisë dhe zhvillimit të vendit”, tha Bytyqi.
Ajo akuzoi qeverinë aktuale për një qasje arrogante dhe të izoluar që, sipas saj, po e çon Kosovën drejtë një krize të re ndërkombetare.
“Vetëvendosje, me qasjen e saj arrogante dhe të izoluar, po e fut Kosovën në krizë të re ndërkombëtare”, potencoi Bytyqi duke shtuar se humbja e mbështetjes amerikane nuk është vetëm çështje diplomatike, por edhe sinjal që kjo qeveri po e lë popullin pa aleatin më të madh strategjik, pra Amerikën.
Ndërkaq, duke komentuar ndikimin e këtyre zhvillimeve në nivelin vendor, Bytyqi parashikoi pasoja për partinë në pushtet, duke shtuar se Vetëvendosje do humbas votues në zgjedhjet lokale të 12 tetorit.
“Është e pritshme që VV të humbasë një pjesë të konsiderueshme të votuesve në qytetet kryesore, sepse njerëzit e dinë se një qeveri që prish marrëdhëniet me SHBA-të, nuk mund të sjellë zhvillim, siguri dhe as perspektivë euroatlantike”, tha ajo.
