Të gjithë jemi krenuar me aksionet e Policisë në veri të Kosovës viteve të fundit, po që më së shumti punën e tyre e kanë përdorur politikanët, me theks të veçantë qeveritarët.
Mirëpo, tash kur situata është qetësuar, ‘heronjtë’ e sovranitetit në veri të shtetit thonë po diskriminohen në punën e tyre.
Veriu.info ka pranuar disa ankesa nga zyrtarë policor që janë në shërbim në zonën kufitare në veri të Kosovës, të cilët thonë se administrata e këtij institucioni po ua ‘vjedh’ pushimin vjetor.
“Na jemi në punë me orar administrativ (v.j. të rregullt) prej 12 orëve, por që me rastin e marrjes së pushimit vjetor një ditë pushim vjetor po na llogaritet një ditë e gjysmë. 1/3 e pushimit vjetor po na vjedhet”, kanë thënë disa zyrtarë policor të kufirit në veri për Veriu.info, duke sqaruar se ditët e pushimit mjekësor dhe ditët e festave llogariten si një (1) ditë pushimi.
Veriu.info ka dërguar pyetje në Policinë e Kosovës për të kuptuar pse zyrtarëve policor të Njësive Kufitare një (1) ditë pushimi vjetor po ju numërohet si një (1) ditë e gjysmë, por që as pas pesë (5) ditëve nuk kemi marrë përgjigje.
Pyetje kemi dërguar edhe në Sindikatën e Policisë, të cilët janë të thirrur t’i mbrojnë interesat e zyrtarëve policor, po që as këta nuk janë përgjigjur për këtë padrejtësi që po ju bëhet zyrtarëve policor të Njësive Kufitare, e as nuk kanë treguar nëse kanë reaguar deri më tash për këtë çështje problematike./Veriu.info
