Presidentja e Kosovës, Vjosa Osmani, gjatë pritjes së organizuar për diasporën në Prishtinë, theksoi se mërgata është ambasadori më i mirë i vendit.
Në fjalën e saj, Osmani shprehu mirënjohjen e thellë për kontributin e madh që mërgata ka dhënë në zhvillimin dhe avancimin e Kosovës.
“Nga Zvicër e në Gjermani, tek ato në ShBA e Kanada, nga universitetet në këto shtete, tek ndërmarrësit në Kanada e në Austri, te teknologjia në Skandinavi, ju keni qenë shtylla e fortë e zhvillimit të shteteve ku keni shkuar. Sot shqiptarët kanë shkuar gjithandej nëpër botë, dhe jo vetëm si prezencë fizike, por edhe si prezencë politike, duke qenë deputetë, kryetarë komunash, profesorë, artistë, inxhinierë, sportistë të suksesshëm, e këngëtarë me famë botërore”.
“Kjo është një faqe lavdie për të gjithë kombin tonë, ngase kudo që shkoni, ju ia zbardhni fytyrën Kosovës, por gjithashtu, kudo që shkoni e mbani me vete Kosovën. Ju e keni përfaqësuar vendin tonë më mirë se çdo fjalë apo slogan, prandaj e themi çdo herë që jeni ambasadorët më të mirë të Kosovës, pa na u hidhëruar ambasadorët tanë që formalisht dhe shumë dinjitetit na përfaqësojnë gjithandej nëpër botë”, u shpreh Osmani.
Në ditën e mirëseardhjes së diasporës në Prishtinë, presidentja Vjosa Osmani shprehu edhe dhimbjen e thellë për ndarjen nga jeta të 33-vjeçarit Rrahim Latifi, mërgimtarit që humbi jetën tragjikisht në Liqenin e Ujmanit.
