Dy bashkëpunëtorë që ishin angazhuar fort, pa hequr dorë as nga elementet e dhunës për të ardhur në pushtet së bashku me lëvizjen e tyre, nuk do të jenë më në të njëjtën listë zgjedhore pas mandatit të parë të plotë në Qeveri. Liburn Aliu nuk është përfshirë në listën e kandidatëve për deputetë, të cilës i prinë Albin Kurti, e me të cilën Vetëvendosje do të garojë në zgjedhjet parlamentare të 9 shkurtit.
Lëvizja Vetëvendosje priti deri në mesnatë – kur do të skadonte afati i zgjatur për disa orë – për ta publikuar listën me kandidatët e saj për deputetë për zgjedhjet parlamentare të 9 shkurtit, të cilën e kishte dorëzuar paraprakisht në Komisionin Qendror të Zgjedhjeve.
Zëvendëskryeministri Besnik Bislimi mungon në këtë listë, ashtu siç nuk ishte përfshirë as në listën e kaluar në zgjedhjet e fundit parlamentare të 14 shkurtit 2021.
Mungesa e Liburn Aliut, ministrit të Mjedisit, Planifikimit Hapësinor dhe Infrastrukturës, një bashkëpunëtori besnik të Albin Kurtit për vite e vite me radhë, në fakt, është më e vërejtshmja aty.
Në listën prej 110 kandidateve me të cilën kryeministri kërkon edhe një mandat qeverisës nuk u përfshi njeriu qe i qëndroi përkrah gjatë gjithë kohës në opozitë, pa hequr dorë as nga elemente të dhunës në përpjekjen relativisht të gjatë që e patën së bashku për ta rritur lëvizjen rebele deri në një forcë drejtuese të vendit që do të lundronte në një det goxha të trazuar kur ata erdhën në pushtet.
Në atë anije nuk qëndrom më Aliu, i cili nuk e shpërndau “listën e fitores” dhe nuk komentoi asgjë në rrjetet sociale, për dallim prej pothuajse të gjithë bashkpartiakëve të tij, përfshirë atyre që nuk u përfshinë në listën e kandidatëve – si Bislimi, për shembull.
Aliu ishte në mesin e 10 kandidatëve më të votuar të LVV-së në zgjedhjet e fundit, duke marrë 22 mijë e 520 vota.
Ai nuk u pa as në një mbledhje të partisë të dielën, në të cilën Kurti u zgjodh kandidat i LVV-së për kryeministër.
Ka më shumë kohë se aq që përflitet për një prishje të marrëdhënieve ndërmjet tyre dhe kjo nuk është mohuar qartazi.
Madje në një rast, mosmarrëveshja ndërmjet Kurtit dhe Aliut u bë publike kur ky i fundit kritikoi qasjen udhëzuese të shefit të tij të partisë ndërsa e konsideronte “gabim” që “duhet të rregullohet sa më parë” vendimin për ta mbështetur publikisht një parti të caktuar në zgjedhjet lokale në Luginën e Preshevës.
“Pavarësisht orientimit dhe simpatisë personale, po mendoj se kjo ka qenë gabim dhe veprim i gabueshëm… Ky ka qenë gabim dhe ky duhet të rregullohet sa më parë”, deklaronte ministri.
Kurti i përgjigjej atij, duke ia kujtuar se kryeministri flet edhe se kush duhet mbështetur edhe në BE e SHBA, “e lëre më në Ulqin e Preshevë”.
“Lëvizja Vetëvendosje e ka qëndrimin e qartë dhe i merr vendimet në organet e veta. Ne e kemi mbështetur edhe Shaip Kamberin në zgjedhjet parlamentare. Aty nuk ka qenë vetëm një bllok, kanë qenë dy blloqe, dhe ne jemi përcaktuar për ta mbështetur aso kohe bllokun të cilit i ka prirë Shaip Kamberi”, thoshte ai para gazetarëve më 2 qershor, kur i kërkohej një koment për deklaratën e Aliut.
“Unë jam kryeministër i Republikës, por njëkohësisht edhe kryetar i Lëvizjes Vetëvendosje. Ju e dini që unë flas publikisht se kush duhet mbështetur edhe në Bashkimin Evropian e në Shtetet e Bashkuara të Amerikës, e lëre më në Ulqin e Preshevë”, shprehej Kurti.
Agim Bahtiri është një nga ‘risitë’ në listën e kandidatëve të LVV-së për deputetë këtë herë. Ai ishte larguar nga drejtimi i Mitrovicës së Jugut pasi i kishte humbur zgjedhjet lokale të nëntorit të vitit 2021 në garën kundër Bedri Hamzës, aktualisht kryetar i kësaj komune dhe kandidat i Partisë Demokratike të Kosovës për kryeministër.
Këngëtarja Edona Llalloshi dhe trajneri i futbollit Bylbyl Sokoli janë dy emra të tjerë që bëjnë pjesë në listën e kandidatëve që kjo parti e dorëzoi në KQZ.
