(16:30) LAJMI I PLOTËSUAR:
Prokuroria Themelore në Prishtinë ka demantuar gazetarin Lirim Mehmetaj se pajisja e GPS e gjetur në veturën e gazetarit Vehbi Kajtazi, i takon AKI-së.
Kjo Prokurori ka njoftuar se “deklarimet e tilla nuk janë në interes të askujt, e aq më pak të drejtësisë”, duke shtuar se deklarime të tilla “mund të dëmtojnë integritetin e hetimeve”.
“Për çdo komunikim dhe lajm nga prokuroria do të njoftohet publiku, sikurse ka ndodhur edhe në të kaluarën, pra përmes kanaleve zyrtare. Prokurori i shtetit do të vazhdoj në luftimin e veprave penale dhe kryerësve të tyre dhe për këtë opinioni publik do të mbahet i informuar, deklarimet e tilla mund të dëmtojnë integritetin e hetimeve dhe nuk i shërbejnë zbardhjes dhe hetimit të veprave penale”, thuhet në komunikatë.
——–
Gazetari Lirim Mehmetaj ka thënë se Prokuroria ka konfirmuar se pajisja e gjetur në veturën e gazetarit Vehbi Kajtazi, i përket Agjencisë së Kosovës për Intelegjencë.
Mehmetaj përmes një shkrimi në rrjetin social Facebook, ka thënë se pas një kërkese për të dhëna nga Dogana e Kosovës, është konfirmuar se pajisja përgjuese është një nga 74 të njëjtat që ishin porositur nga AKI-ja.
“Pas një kërkese për të dhëna nga Dogana e Kosovës është konfirmuar se aparati që iu gjet Kajtazit në veturë është një nga 74 pajisjet e njëjta që kishin ardhur në Kosovë si material i porositur për AKI-në.
Sipas burimit në Doganën e Kosovës, pas kërkesës, Dogana ia ka ofruar këto të dhëna Prokurorisë.
Nga ajo që deri më tani aktualisht kam marrë vesh – çuditërisht – askush nga palët nuk është i interesuar shumë të vazhdohet me rastin deri në zbardhje të plotë të përgjegjësve që ilegalisht përcjellën gazetarin” – ka shkruar ai.
Mehmetaj ka thënë se me një pajisje të njëjtë, është përcjellur edhe vetë ai gjatë një kohe.
“Unë personalisht, përveç se kërkoi zbardhje të rastit deri në detaje që përgjegjësit të ballafaqohen me drejtësinë, tash, pasi veç kanë përgju për një kohë, bëj thirrje publike që të publikohen të gjitha përgjimet që më janë bërë mua.
Dua që i gjithë publiku i Kosovës të dëgjojë çdo bisedë timen për kohën që jam përgjuar” – ka shkruar gazetari.
Në tetor të vitit të kaluar, Kajtazi kishte njoftuar se gjatë kontrollit në një servis të veturës së tij, ishte gjetur një pajisje e dyshimtë.
“Sot kam sjell veturen ne servis per kontroll. Gjate kontrollit eshte zbuluar se ne veturen time eshte nje pajisje e dyshimte e vendosur ne anen e majte afer rrotes. Policia eshte ne vend te ngjarjes duke pritur njesite e specializuara. Per kete rast eshte njoftuar edhe prokurori i shtetit” – kishte thënë ai.
Kajtazi kishte publikuar edhe pamje të pajisjes në fjalë.
