Pasi që disa fletëvotimë u evidentuan me numra serikë të ‘gabuar’ në Qendrën e Numërimit në Mitrovicë, procesi ishte pezulluar mbrëmë me urdhëresë të prokurorit Shpetim Peci.
Zyrtarë të PDK-së kishin ngritur shqetësimin pse prokurori Shpetim Peci po merret me rastin, duke pretenduar se ai është është kushëri i Faton Pecit dhe mund të mos jetë objektiv në trajtimin e rastit.
Sot, me urdhëresë të prokurorit Sahit Tmava ka urdhëruar rifillimin e procesit të fletëvotimeve nën prezencën e dy hetuesve policer të caktuar nga Prokuroria Themelore e Mitrovicës.
Në arsyetimin e urdhëresës përmendet fakti se kompania CETIS që ka bërë printimin e fletëvotimeve ka pranuar gabimin me rastin e printimeve.
Duke parë se tjetër prokuror urdhëruar pezullimin e numërimit dhe tjetër prokuror ka lëshuar urdhëresë për rifillimin të numërimit, Veriu.info ka dërguar pyetje në Prokurorinë Themelore të Mitrovicës për t’i pyetur se a është larguar nga rasti prokurori Shpetim Peci.
“Prokurori Shpëtim Peci nuk merre me këtë rast, ka qenë kujdestar ditën e zgjedhjeve dhe në atë cilësi është njoftuar nga policia. Për këtë arsye, urdhëri për ri fillim të numërimit është lëshuar nga prokurori kujdestar i Departamentit për Krime të Rënda Sahit Tmava”, thuhet në përgjigjen e zyres për informim të Prokurorisë Themelore në Mitrovicë për Veriu.info.
