Kryetari i Lidhjes Demokratike të Kosovës, Lumir Abdixhiku përmes një postimi në Facebook ka reaguar në lidhje me propozimet e fundit të Lëvizjes Vetëvendosje për kryetar të Kuvendit.
Ai u shpreh se ky është niveli i tyre dhe se këta janë njerëzit me të cilët, siç tha ai, pretendojnë të udhëheqin shtetin.
“Pse po habiteni? Ky edhe është niveli i tyre. Kjo është derexheja në të cilën kemi ra si vend. Këta janë njerëzit me të cilët pretendojnë të udhëheqin këtë shtet. Ju përçmojnë; prandaj dhe me përçmim ju përfaqësojnë”, shkroi ai.
Abdixhiku u shpreh se qëndrimet e LDK-së janë parimore dhe siç tha, konsistente që nga dita e parë.
Ai gjithashtu tha se pa marrëveshje nuk mund të ketë shumicë dhe “nuk mund të ketë votë për askënd”.
“Qëndrimet e LDK-së janë parimore dhe konsistente që nga dita e parë. Sepse janë të tilla, edhe po qëndrojnë mbi lojërat patetike politike. Pa marrëveshje nuk mund të ketë shumicë. Pa marrëveshje nuk mund të ketë votë – për askend dhe asnjërin! Marrëveshje uniteti ofruam, nuk e deshën. Tani le të bartin përgjegjësinë e bllokimit. Jemi të bindur gjithsesi, se duke sharë e ofenduar në vazhdimësi, nuk do të ndryshojnë mendimin e asnjërit”, u shpreh tutje ai.
