Kryetari i Organizatës së Veteranëve të Luftës së UÇK-së, Hysni Gucati, ka bërë të ditur se janë bërë të gjitha përgatitjet që dhjetëra qytetarë nga Kosova të marrin pjesë në protestën e paralajmëruar për 14 shtator, në mbështetje të ish-krerëve të UÇK-së që po gjykohen në Dhomat e Specializuara.
Gucati në një intervistë për GazetaBlic, thotë se mobilizimi ka shkuar shumë mirë dhe se ka një interes të madh për pjesëmarrje, duke shtuar se për herë të parë, do të ketë një numër të madh qytetarësh që do të udhëtojnë nga Kosova për të marrë pjesë në protestën paqësore.
“Është tu shku shumë mirë, mërgata dhe veterantë që kemi në mërgatë janë shumë të mobilizuar, por për herë të parë nga Kosova do të ketë shumë që do të vijnë, besoj që do të shkoj shumë mirë do të jetë një protestë paqësorë do të ngrisim zërin që po ndodh një padrejtësi e madhe ndaj krerëve të UCK-së”, shtoi ai.
Ai gjithashtu shtoi se në protestë do të ketë pjesëmarrës nga shumë shtete, përfshirë Zvicrën, Gjermaninë, Belgjikën, Italinë dhe SHBA-në, dhe se deri më tani janë organizuar 6 autobusë nga Kosova, ndërsa ka edhe fluturime të organizuara nga Shkupi, Tirana dhe Prishtina
“Do të jetë një numër bukur i madh sepse interesimi është shumë i madh, mesazhem kam se njërzit janë në takime në shoqata të ndryshme në Evropë, sidomos në Zvicërr, Gjermani, Belgjikë, Itali edhe prej Amerike do të ketë që do të vijnë. Edhe këtu është mirë prej Kosove që do të nisen, se deri më tash janë 6 autobusa që do të nisën, kanë bo edhe me avion prej Shkupi dhe Tirane gjithashtu edhe nga Prishtina”, u shpreh ai.
Gucati thekson se nuk kërkojnë mëshirë nga Gjykata Speciale, por vetëm drejtësi, ku ajo drejtësi të vihet në vend dhe të mos bëhen padrejtësi siç janë duke ndodhur edhe sot.
“Unë mendoj që mesazhi më i madh për Gjykatën Speciale është vet numri i qytetarëve që do të vijnë që Gjykata Speciale dhe ndërkombëtarët do të binden kur të shohin tërë atë masë të qytetarëve në Hagë apo edhe në Prishtinë kur e kanë parë do ta dinë që UÇK ka qenë e pastër, ka qenë luftë e drejtë, ne e kemi hjek një armik nga Kosova, mesazhi jonë do të jetë se nuk kërkojmë mëshirë, kërkojmë vetëm drejtësi, ajo drejtësi të vihet në vend dhe të mos bëhen padrejtësi sic janë duke ndodhur edhe sot”, përfundoi ai.
