Objekti i Qendrës Tregtare “Mall Mitrovica” është i marrë me qera prej një biznesi privat nga ndërmarrja komunale “Omni Sport”, ku aksionar me 100% është komuna e Mitrovicës së jugut.
Në këtë Qendër që gjendet pranë Urës së Ibrit në Mitrovicën e jugut prej disa ditësh janë zhvilluar punime në katin përdhesë nga qiramarrësi, pa marrë asnjë leje nga qiradhënësi dhe as nga Drejtoria e Urbanizmit.
Veriu.info ka siguruar fotografitë nga punimet strukturore që po zhvillohen në katin përdhesë, ku shihet se gjysma e hapësirës së parkingut është bllokuar.
Në pyetjet e dërguara se a ka marrë leje apo pëlqim qiramarrësi për këto punime që po i zhvillon, Drejtoria e Urbanizmit e Komunës së Mitrovicës,
“Sa i përket pyetjes së parë se a ka marr leje qiramarrësi për intervenim të objektit në strukturën e katit përdhesë, në Drejtorin e për Planifikim dhe Urbanizëm deri më sot nuk kemi pranu ndonjë kërkesë as për pëlqim si dhe as për Leje ndërtimore. Si dhe nuk ë lejohet qiramarrësit të bëjë intervenime në objekt me punë ndërtimore pa u pajis me pëlqim për intervenim në DPU”, thuhet në përgjigjen e Drejtorisë së Urbanizmit të Komunës së Mitrovicës.
Kjo drejtori komunale përfundon përgjigjen duke thënë: “Për info të tjera ju lus të kontaktoni Drejtorinë për Inspeksion dhe të na njoftojnë lidhur me rastin se çfarë është duke u zhvilluar në objektin në fjalë.”
Më datë 20 nëntor 2024 Veriu.info ka dërguar pyetje në Drejtorinë e Inspeksionit të Komunës sipas udhëzimeve të Drejtorisë së Urbanizmit për të marrë sqarime në lidhje me punimet ilegale që po zhvillohen në “Mall Mitrovica”, por që deri në momentin e publikimit të këtij artikulli nuk kemi marrë përgjigje.
