Bordi i Drejtorëve i emëruar nga komuna e Vushtrrisë që udhëheqet prej PDK-së me kryetar komune Ferit Idrizin, i ka vazhduar edhe për tre vite mandatin kryeshefit ekzekutiv të ndërmarrjes lokale “Përparimi”, Fadil Bahtirit.
VeriuInfo mëson se Fadil Bahtirit mandati i është vazhduar para disa javës, ku sipas burimeve të portalit, ka ngjallur reagime të shumta brenda strukturave të PDK-së me arsyetimin për favorizim të mbështetësve të LDK-së nga pushteti lokal i udhëhequr nga kryetari Ferit Idrizi.
Fadil Bahtiri, ishte zgjedhur në vitin 2021 kryeshef ekzekutiv i ndërmarrjes “Përparimi” me mandat tre vjeçar, vetëm disa muaj pa hyrë në fushatë zgjedhore, raporton VeriuInfo.
Ndryshe, Fadil Bahtiri ka qenë zëdhënës i LDK-së nê Vushtrri në vitin 2017, vit kur Xhafer Tahiri i LDK-së e kishte mposhtur Ferit Idrizin e PDK-së në garën për kryetar komune. Pas marrjes së mandatit të kryetarit të komunës nga Xhafer Tahiri, Fadil Bahtiri ishte emëruar zyrtar në kuadër të kabinetit të kryetarit.
Pas zgjedhjeve të vitit 2017, Fadil Bahtiri ka qenë anëtar i Kryesisë së LDK-së në Vushtrri, mandat të cilin e ka pasur deri pas zgjedhjeve të vitit 2021./VeriuInfo
