Për Moskën, protestat e vazhdueshme në Serbi janë ndërhyrje nga jashtë, kurse vetëm qeveria aktuale gëzon mbështetje prej Kremlinit.
Kjo është bërë e ditur me rastin e një bisede telefonike të zhvilluar sot mes presidentit serb Aleksandër Vuçiq dhe atij rus, Vladimir Putin.
Me këtë rast, autokrati rus e ka quajtur të papranueshme “ndërhyrjet” në gjendjen e brendshme politike në Serbi.
“Putini ka theksuar papranueshmërinë e ndërhyrjes së jashtme në gjendjen e brendshme politike në Serbi dhe shprehu mbështetjen e tij për veprimet e autoriteteve të zgjedhura ligjërisht”, është thënë në një kumtesë nga zyra e Presidencës ruse të cituar nga mediat serbe.
Po ashtu, pala ruse ka shprehur solidaritet edhe me presidentin e Republikës Serbe në Bosnjë, Milorad Dodik.
