Paneli Zgjedhor për Ankesa dhe Parashtresa (PZAP) ka gjobitur Lidhjen Demokratike të Kosovës me 5,100 euro për një fjalim të kryetarit të Prishtinës, Përparim Rama, në Kuvendin Komunal të Prishtinës.
Sipas PZAP-së, Lëvizja Vetëvendosje më 25.09.2025 është ankuar se kandidati i LDK-së për kryetar të Komunës së Prishtinës, Përparim Rama, në mbledhjen e jashtëzakonshme të Kuvendit Komunal, të mbajtur më 14.09.2025, ka shfrytëzuar foltoren e Kuvendit Komunal të Prishtinës për të bërë fushatë elektorale për veten dhe subjektin që përfaqëson.
Sipas ankesës së paraqitur në PZAP, Rama, pas dështimit të miratimit të Projektbuxhetit për vitin 2026, para anëtarëve të Kuvendit ka deklaruar: “Ftoj qytetarët e kryeqytetit të reflektojnë, që më 12 tetor t’ua tregojmë vendin secilit asambleist që e ka bllokuar dhe vazhdon ta bllokojë këtë proces demokratik të zhvillimit dhe transformimit të kryeqytetit me votën e tyre. Prandaj, më 12 tetor urojmë ta kemi një shumicë me të cilën do ta vazhdojmë transformimin e qytetit ashtu siç kemi bërë këto 4 vite. Ju uroj ditë të mirë sot dhe fitore më 12 tetor”.
Për këtë, PZAP ka gjetur se ankesa e Lëvizjes Vetëvendosje ndaj Përparim Ramës është e bazuar.
Kjo për shkak se paneli që ka shqyrtuar ankesën ka konstatuar se kandidati i LDK-së për kryetar të Prishtinës, Përparim Rama, ka shfrytëzuar pozitën publike me qëllim të përfitimit të votave, duke shkelur kështu Ligjin për Zgjedhjet e Përgjithshme, i cili thotë se personi që mban pozitë publike, i zgjedhur apo i caktuar, nuk mund të përdorë atë zyrë apo pasuritë e saj me qëllim të përfitimit të votave.
“Përparim Rama ka shfrytëzuar hapësirat e brendshme të Komunës së Prishtinës, respektivisht foltoren e Kuvendit Komunal të Prishtinës, u bëri thirrje qytetarëve që më 12 tetor, pikërisht ditën e votimit, të reflektojnë se për kë duhet të votojnë, me qëllim të krijimit të një shumice në asamble. Këtë deklarim e bëri gjatë fushatës zgjedhore për zgjedhjet lokale të datës 12 tetor 2025, me qëllim të përfitimit të votave, duke qenë në garë edhe për një mandat për kryetar të Prishtinës” – thuhet në vendimin e PZAP.
Në anën tjetër, në përgjigje ndaj ankesës, LDK e ka vlerësuar atë si të pabazuar, duke theksuar se, sipas tyre, kandidati i tyre është kryetar aktual i Komunës dhe ka përgjegjësi që buxhetin dhe procedurat e tjera t’i kryejë në të mirë të qytetarëve, pavarësisht fushatës. Sipas LDK-së, fjalët e tij në atë seancë nuk kanë qenë pjesë e garës zgjedhore.
“Qëllimi ka qenë vetëm votimi i buxhetit për të mirën e kryeqytetit dhe për qytetarët, që të arrijnë t’i marrin shërbimet e tyre” – citohet përgjigjja e LDK-së në ankesën e LVV-së.
Vendimi thekson se LDK ka afat 15 ditë për ta paguar gjobën nga dita e plotfuqishmërisë së këtij vendimi.
Zgjedhjet lokale në Kosovë do të mbahen më 12.10.2025. Fushata zgjedhore ka filluar më 13.09.2025 dhe zgjat deri më 12 tetor, ora 06:59.
Kandidatët për kryetar të Komunës së Prishtinës janë: Përparim Rama nga LDK, Hajrulla Çeku nga LVV, Uran Ismaili nga PDK, Bekë Berisha nga AAK dhe Besa Shahini nga PSD.
Në garë për nivelin lokal janë 93 subjekte politike: 32 parti, 2 koalicione, 32 iniciativa qytetare dhe 27 kandidatë të pavarur, të gjitha të certifikuara nga Komisioni Qendror i Zgjedhjeve (KQZ).
Vendimin e plotë të PZAP-së mund ta gjeni KËTU.
