Kandidatja për deputete nga radhët e Lidhjes Demokratike të Kosovës, Doarsa Kica-Xhelili, ka elaboruar tentimin e ish-qeverisë Kurti II për të krijuar narrativin e rremë se LDK dhe Gjykata Kushtetuese ia bllokuan Ligjin për Çmimet Tavan.
Kica-Xhelili sqaroi se Gjykata Kushtetuese ka përcaktuar qartë se shteti mund të ndërhyjë në treg, por vetëm përmes një organi të pavarur dhe jo drejtpërdrejt nga qeveria.
Ajo akuzoi ekzekutivin për hartimin e një ligji që i jepte kompetenca ekskluzive kryeministrit dhe ministrit për të ndikuar në çmimet tavan, duke e trajtuar tregun si vegël politike dhe jo si kategori kushtetuese:
“Gjithçka shumë shtrejt – e vërtetë. Por a flasim se si iu ka mashtru kjo qeveri me Ligjin për Çmimet Tavan. Kjo qeveri e ka kriju një narrativë të rreme për Çmimet Tavan dhe po dua t’ua zbërthej sot. Kur LDK e dërgoi ligjin në Gjykatë Kushtetuese, Vetëvendosja tha se nuk po na lejon LDK-ja me i ul çmimet. Kjo nuk është vetëm e pavërtetë, kjo është manipulim i pastër sepse Gjykata nuk i ndaloi asgjë shtetit, as rregullimin e çmimeve as vendosjen e çmimeve tavan. Përkundrazi, vendimi i Gjykatës Kushtetuese ka thënë, po shteti mund të ndërhyj në treg por këtë duhet ta bëjë përmes një organi të pavarur, jo përmes qeverisë.
Ku ishte gabimi – qeveria Kurti shkroi një ligj që ia jepte ekskluzivisht autoritetin kryeministrit dhe ministrit me ndiku direkt në çmimet tavan. Pra e trajtuan tregun si vegël, jo si kategori kushtetuese. Kjo qeveri e patë mundësinë me i ul çmimet, i pat mjetet e pat juridiksionin, e patë praktikën evropiane por i mungoi vullneti. Ka qenë më e lehtë për ta për ta shpikur një fajtor sesa me bë një ligj të mirë.” – deklaroi Kica-Xhelili ndër të tjera.
