Sipas ministrit të Jashtëm gjerman, Johan Wadephul qeveria gjermane ka ende disa pyetje në lidhje me këtë organ.
“Ne kemi një këshill paqeje, dhe ai është Kombet e Bashkuara”, tha politikani i CDU-së gjatë një vizite në kryeqytetin kenian, Nairobi. Në të njëjtën kohë, ai pranoi se Kombet e Bashkuara duhet të reformohen dhe të bëhen më efektive – ashtu siç Trump ka kërkuar vazhdimisht.
Sipas ministrit, qeveria gjermane ka ende disa pyetje në lidhje me këtë Këshillin e Paqes. “Këto mbeten pa përgjigje deri më sot. Por ne do t’i diskutojmë ato në një dialog konstruktiv.” Ndërkohë, Gjermania demonstron “çdo ditë përmes veprimeve të saj praktike se sistemi i OKB-së është sistemi ynë i paqeruajtjes, një sistem që meriton mbështetjen tonë të plotë”.
Baerbock: Rezoluta e OKB-së përcakton detyrën e Bordit të Paqes për Gazën
Paraardhësja e Wadephul, Annalena Baerbock,shprehu një pikëpamje të ngjashme. Presidentja aktuale e Asamblesë së Përgjithshme të OKB-së i tha Agjencisë Gjermane të Shtypit se Këshilli i Sigurimit i OKB-së i kishte dhënë “Këshillit të Paqes” një mandat ligjërisht të detyrueshëm sipas ligjit ndërkombëtar me një detyrë të përcaktuar qartë: Organi duhet të veprojë në një bazë kalimtare në konfliktin midis Izraelit dhe Hamasit në Rripin e Gazës. Grupi militant islamist Hamas, i cili shkaktoi luftën në territorin palestinez me sulmin e tij të madh ndaj Izraelit në tetor 2023, klasifikohet si një organizatë terroriste nga shumë shtete.
Baerbock e hedh poshtë idenë që “Këshillit të Paqes” t’i besohen detyra globale, siç synon tani Trump. Ajo argumenton se Kombet e Bashkuara ekzistojnë tashmë si një organizatë ndërkombëtare, detyra dhe qëllimi i së cilës është ruajtja e paqes botërore dhe sigurisë ndërkombëtare. Sipas politikanes së Partisë së Gjelbër, të gjitha shtetet anëtare, pavarësisht nga madhësia, forca ekonomike apo ushtarake e tyre, kanë një vend dhe një votë në Kartën e OKB-së e kjo për “arsye shumë të mirë”.
“Duke qendruar për vetëmbrojtje”
“Nëse disa shtete tani përpiqen të zbatojnë ligjin e më të fortit, kjo aleancë ndërrajonale – pavarësisht të gjitha dallimeve të tjera – duhet të mbrohet qartë dhe me vendosmëri për t’u vetëmbrojtur dhe për të mbrojtur rendin ndërkombëtar të bazuar në rregulla”, theksoi Baerbock.
Sipas Shtëpisë së Bardhë, Trump do të bëjë një njoftim në lidhje me “Këshillin e Paqes” këtë të enjte në Forumin Ekonomik Botëror në Davos të Zvicrës. Raportet e medias tregojnë se ai do të nënshkruajë më pas të ashtuquajturën kartë, rregulloren e saj. Drafti është dërguar në afërsisht 60 vende, përfshirë Rusinë dhe Kinën.
Franca, Italia dhe Suedia refuzojnë
Reagimet ndërkombëtare ndaj iniciativës kanë qenë shumë të ndryshme. Disa vende, veçanërisht në Evropën Perëndimore, refuzuan, duke përfshirë Francën, Suedinë dhe – sipas një raporti në gazetën milaneze “Corriere della Sera” – Italinë. Megjithatë, Kosova shprehu mbështetjen e saj. Kryeministri izraelit Benjamin Netanyahu gjithashtu e ka pranuar ftesën e Trump. Kryeministri hungarez dhe aleati i Trump Viktor Orbán ishte një nga të parët që e pranoi atë. Më vonë, vende të tilla si Kanadaja, Emiratet e Bashkuara Arabe, Argjentina, Vietnami, Pakistani, Armenia dhe Bjellorusia ndoqën shembullin. /DW
