Qeveria ka miratuar një udhëzim administrativ, përmes të cilit synon rregullimin e çmimeve të derivateve të naftës.
Kryetari i Shoqatës së Naftëtarëve, Fadil Berjani i cili u alarmua që prej kur Qeveria paralajmëroi nxjerrjen e këtij akti nënligjor, i tha Gazetës Express se nuk e kanë pranuar ende vendimin e Ekzekutivit, dhe si rrjedhojë, s’mund të deklarohen ende.
“Ne ende nuk e kemi pranuar vendimin nga Qeveria. Si dhe ende nuk e kemi mbajtur takimin me perfaqësues të kompanive që tregtojnë me naftë në Kosove, dhe për këtë nuk mund të deklarohemi”, tha Berjani.
Çmimet e naftës dhe benzinës kanë arritur në nivele rekord kohët e fundit dhe ndërhyrja e Qeverisë u cilësua si brutale nga naftëtarët.
Në një letër që kreu i naftëtarëve, Fadil Berjani ua ka dërguar kryeministrit Albin Kurti dhe ministrave ka kërkuar ulje të akcizës dhe TVSH-së për produktet e naftës. Ka paralajmëruar edhe mbyllje të pompave të derivateve në gjithë vendin, nëse kërkesat e tyre s’merren parasysh.
Ministrja e Tregtisë, Rozeta Hajdari, në fjalën para kabinetit qeveritar tha se si kanë vërejtur mospërputhje në çmimet e naftës në treg dhe se këto veprime po i ndërmarrin për t’i mbrojtur konsumatorët.
“Qeveria me akt nënligjor të përcaktojë çmimin e karburanteve të naftës që bëhet për të mbrojtur konsumatorin dhe për të rregulluar konkurrencën. Në bazë të evidencave që ka Ministria e Tregtisë, ka mospërputhje në çmimet e naftës në treg. Udhëzimi në fjalë është përgatitur në koordinim me Ministrinë e Financave dhe me këtë udhëzim propozoj përcaktimin e menjëhershëm të çmimit maksimal të lejuar për derivatet. Në emër të Ministrisë së Tregtisë i propozoj qeverisë miratimin e udhëzimit administrativ për rregullimin e çmimit të karburanteve të naftës”, tha Hajdari.
Sipas draftit të këtij vendimi të publikuar në media, së paku 2 deri 3 centë është paraparë të jetë fitimi për një litër naftë për shitësit me shumicë, ndërsa 6-10 centë për shitësit me pakicë.
Ndëkraq, 10 centë për litër është paraparë të jetë fitimi për shitje me pakicë për subjektet që nuk janë importuese.
Kjo do ta ulte çmimin aktual të derivateve për 12 centë.
