Komuna e Vushtrrisë e udhëhequr nga kryetari Ferit Idrizi kishte shpallur tender në muajin prill me titull “Furnizim me perde dhe tepiha”, ku vlera e parashikuar e kontratës ishte 20,510 euro.
Në dosje të tenderit është bërë e ditur se dërgesa e perdeve dhe tepihëve duhet të bëhet të Kabineti i Kryetarit, Drejtoria e Arsimit dhe Drejtoria e Administratës, raporton Veriu.info.
Në këtë tender kanë aplikuar gjashtë operatorë ekonomik, ku katër prej tyre kanë ofertuar me çmim më të lirë se sa fituesi i tenderit “IBM” Sh.P.K.
Siç edhe mund të shihni në njoftimin mbi vendimin e autoritetit kontaktues, “IBM” Sh.P.K. tenderin e ka fituar me ofertë në vlerë prej 19 mijë 284 euro, përderisa ofertuesi më i lirë ishte “HPI” Sh.P.K më ofertë prej 16 mijë e 863 euro, i pasur edhe nga tre operatorë tjerë më të lirë se sa fituesi.
Në njoftim mbi shpalljen fitues të “IBM” Sh.P.K., shihet se vendimin e ka nënshkruar Zyrtari Përgjegjës i Prokurimit, Ilmi Azemi, i cili është edhe drejtor i Drejtorisë së Prokurimit, raporton Veriu.info.
Po si erdhi deri të nënshkrimi i kësaj kontrate nga Ilmi Azemi, kjo është situatë specifike për komunën e Vushtrrisë. Azemi në fund të vitit të kaluar ishte emëruar drejtor i Drejtorisë së Prokurimit, po që më pas kishte ndodhur një varg largimesh të drejtorëve nga qeverisja e Ferit Idrizit, qoftë me dorëheqje apo shkarkim, sepse arsyet e vërteta në të shumtën e rasteve janë kapluar nga ‘mjegulla’.
Kryetari Ferit Idrizi me 12 dhjetor 2023 kishte publikuar shkrim me foto në rrjete sociale, ku tregonte se kishte emëruar Ilmi Azemin si drejtor të Prokurimit në Komunën e Vushtrrisë. Deri këtu gjithçka është e qartë sa i përket emërimit të tij.
Por çudia ndodhi se kryetari Ferit Idrizi të njëjtin person, Ilmi Azemin, e ka emëruar drejtor të Prokurimit për të dytën herë brenda pak muajve.
Në dokumentin e siguruar nga Veriu.info shihet se kryetari Ferit Idrizi, e ka emëruar Ilmi Azemin drejtor të Prokurimit më 4 qershor 2024, rast të cilin do ta sqarojmë në shkrimin e radhës.
